„აკადემიური ქალაქი“ ახალი კულტურაა ჩვენს რეალობაში. გამოქვეყნდა სასწავლო ცენტრის გენერალური გეგმა

პრემიერ-მინისტრმა ნიკოლ ფაშინიანმა ფეისბუქის საკუთარ გვერდზე ვიდეო გამოაქვეყნა და აცხადებს, რომ „აკადემიური ქალაქის“ გენერალური გეგმა მზად არის. ეს 450 გვერდიანი პაკეტი გერმანულმა კომპანიამ გამოაგზავნა.

პრემიერმა ეს ფუნდამენტურ სამუშაოდ მიიჩნია და აღნიშნა, რომ ეს არის ახალი კულტურა ჩვენს რეალობაში.

აკადემიურ ქალაქში, რომელიც განათლების განვითარების სტრატეგიით 2030 წლამდეა დაგეგმილი, მომდევნო 5 წლის განმავლობაში არც ერთი უნივერსიტეტი არ გადაინაცვლებს. როგორც ადრე „აკადემიური ქალაქის“ გენერალური გეგმის შემმუშავებელი გერმანული კომპანიის წარმომადგენელმა ტობიას კეილმა განაცხადა, პირველი შენობები 2029 წელს აშენდება და ისინი იქნება საზოგადოებრივი დანიშნულების ობიექტები.

„პრიორიტეტულია საზოგადოებრივი ტრანსპორტი და ინფრასტრუქტურა, ასევე აშენდება საზოგადოებრივი შენობები: კულტურის ცენტრი, საკონცერტო დარბაზი, ბიბლიოთეკა. მიუხედავად იმისა, რომ ქალაქის მთავარი მახასიათებელი აკადემიური ატმოსფერო იქნება, ქალაქი არ იქნება მხოლოდ საგანმანათლებლო ადგილი და არც ცენტრი მხოლოდ მეცნიერებისა და აკადემიური საზოგადოებისთვის, ასევე იქნება რესტორნები, კომერციული ცენტრები, რომლებიც მოემსახურებიან საზოგადოებას“.

განათლების ექსპერტი სერობ ხაჩატრიანი ამბობს, რომ თავიდანვე ცნობილი იყო, რომ პროგრამა გრძელვადიანი იქნება. მაგრამ ის, რომ 2030 წელს მხოლოდ პირველი კლასტერი იქნება, უკვე ნიშნავს, რომ სამოქმედო გეგმას ჩამოვრჩებით.

„ამავდროულად, განათლების განვითარების სახელმწიფო პროგრამის ქმედებებში გარკვევით წერია, რომ 2030 წელს უკვე უნდა შეიქმნას „აკადემიური ქალაქი“. ანუ სახელმწიფო განვითარების გეგმასთან შედარებით გვაქვს 20-25 წლიანი დარღვევა“.

„აკადემიური ქალაქის“ გენერალური გეგმა უკვე მზადაა, საბოლოო ვერსია კი საზოგადოებას წარუდგინეს. ქალაქი ერევნის მე-17 კვარტალის მიმდებარედ დაახლოებით 680 ჰექტარ ფართობზე აშენდება, რომელიც სხვადასხვა ტრანსპორტით დაუკავშირდება როგორც დედაქალაქს, ასევე რეგიონებს. „აკადემიური ქალაქის“ ტერიტორიაზე 16-მდე უნივერსიტეტის – რვამდე გაფართოებული სახელმწიფო უნივერსიტეტისა და რვამდე არასახელმწიფო თუ საერთაშორისო უნივერსიტეტის განთავსება იქნება შესაძლებელი.

განათლების ექსპერტ სერობ ხაჩატრიანს პროექტის წარმატებაში ეჭვიც კი არ ეპარება. მისი თქმით, პრობლემა კონსტრუქცია კი არა, შინაარსია. ექსპერტი დარწმუნებულია, რომ გერმანელები კარგ საქმეს გააკეთებენ, მაგრამ ჯერ არ გაუგია რაიმე დამაჯერებელი არგუმენტი, რომ შედეგად უმაღლესი განათლების ხარისხი გაიზრდება.

მიუხედავად იმისა, რომ განათლების ექსპერტი გაკვირვებულია, განათლების სამინისტრო ირწმუნება, რომ პროგრამის მთავარი მიზანია მოხვდეს მსოფლიოს საუკეთესო 500 უნივერსიტეტში და გახადოს უმაღლესი განათლების სისტემა კონკურენტუნარიანი და მიმზიდველი უცხოელი სტუდენტებისთვის, რომელთა რაოდენობა სულ მცირე  უნდა გაორმაგდეს.