სომხეთსა და რუსეთს შორის მზარდი დაძაბულობა ართულებს რეგიონული უსაფრთხოების დინამიკას, „უპირველეს ყოვლისა, იმის გამო, რომ რუსეთმა არ ისურვა ჩარევა მთიანი ყარაბაღის კონფლიქტში 2023 წელს“. ამის შესახებ ნათქვამია საერთაშორისო სარეიტინგო სააგენტო S&P Global Ratings-ის ანგარიშში. „რუსეთის უმოქმედობის საპასუხოდ სომხეთი უსაფრთხოების სტრატეგიას გადახედავს. ეს მოიცავს რუსეთის ხელმძღვანელობით კოლექტიური უსაფრთხოების ხელშეკრულების ორგანიზაციის წევრობის შეწყვეტის განზრახვის განცხადებას და დასავლეთის ქვეყნებთან მჭიდრო კავშირების გააქტიურებას. სომხეთმა ასევე გამართა ერთობლივი სამხედრო წვრთნები შეერთებულ შტატებთან, რაც მიუთითებს სტრატეგიულ ცვლილებაზე მისი საერთაშორისო ალიანსების გაძლიერებისკენ“, – ნათქვამია ანგარიშში. S&P-ის ცნობით, ეს მოვლენები ხელს უწყობს სომხეთში გეოპოლიტიკური გაურკვევლობის დონის ამაღლებას, ქვეყნის რუსეთზე მნიშვნელოვანი ეკონომიკური და ენერგეტიკული დამოკიდებულების გათვალისწინებით. „2023 წელს სომხეთის მთლიანი ექსპორტის დაახლოებით 40% რუსეთზე გადიოდა, ხოლო იმპორტის დაახლოებით 31,5%. გარდა ამისა, ფულადი გზავნილების თითქმის 70% რუსეთიდან შემოვიდა, რაც ხაზს უსვამს ორ ქვეყანას შორის ფართო ფინანსურ კავშირებს. ეს დამოკიდებულება აშკარაა ენერგეტიკის სექტორშიც. რუსეთი სომხეთის ბუნებრივი აირის თითქმის 90%-ს აწვდის მილსადენებით, რაც 2022 წელს ქვეყნის ენერგეტიკული მოთხოვნილების 60%-ს შეადგენდა. ეს დამოკიდებულება რუსეთზე კრიტიკულ ეკონომიკურ და ენერგეტიკულ რესურსებზე ხაზს უსვამს იმ პოტენციურ დაუცველობას, რომელსაც სომხეთი აწყდება გეოპოლიტიკური დინამიკის შეცვლაში“, – ნათქვამია დოკუმენტში. S&P ანალიტიკოსები ასევე თვლიან, რომ უსაფრთხოების რისკები ერევანსა და ბაქოს შორის ახლო მომავალში შენარჩუნდება, „განსაკუთრებით იმის გათვალისწინებით, რომ აზერბაიჯანის ოფიციალური პირები არაერთხელ უწოდებდნენ სომხეთის ტერიტორიის ნაწილებს „დასავლეთ აზერბაიჯანად“.
