COP29 სამიტის ოფიციალური პარტნიორები კავშირში არიან ალიევების ოჯახსა და მის ახლო წრესთან
ბაქოს ამ წლის საერთაშორისო ვიზიტორები ყველგან ნახავენ კომპანიებს, რომლებიც დაკავშირებული არიან აზერბაიჯანის ავტორიტარული პრეზიდენტის ილჰამ ალიევის ოჯახთან, წერს ორგანიზებული დანაშაულისა და კორუფციის გაშუქების ცენტრი (OCCRP).
ბაქოში ამ თვის ბოლოს გასამართ გაეროს COP29 ღონისძიების 5000 მონაწილე განთავსდება ულტრა მდიდრულ Sea Breeze Resort-ში კასპიის ზღვის სანაპიროზე, რომელსაც პლაჟზე შვიდ კილომეტრზე, 50-ზე მეტ ბარსა და რესტორანზე, 60 საცურაო აუზზე წვდომა აქვს. მაგრამ ვიზიტორებმა შეიძლება არ იცოდნენ, რომ 500 ჰექტარი Sea Breeze კომპლექსი ეკუთვნის ემინ აგალაროვს, აზერბაიჯანის ავტორიტარული პრეზიდენტის ილჰამ ალიევის ყოფილ სიძეს. სახელმწიფო შესყიდვების ანგარიშები აჩვენებს, რომ მას მიენიჭა $5.2 მილიონის სახელმწიფო კონტრაქტი COP29 სტუმრების მასპინძლობისთვის ყოველგვარი კონკურენტული პროცესის გარეშე.
წყაროს ცნობით, თითქმის ყველა ადგილობრივი კომპანია, რომელიც კონფერენციის ერთ-ერთი „ოფიციალური პარტნიორია“, რეალურად ეკუთვნის ქვეყნის მმართველ ოჯახს ან მათთან საქმიანი კავშირის მქონე პირს.
„COP29-ის ეს პარტნიორები, მათ შორის პრეზიდენტის ქალიშვილების კუთვნილი კონგლომერატი, ისარგებლებენ საერთაშორისო აუდიტორიის არსებობით, გამოფენის სპეციალურ ზონაზე წვდომით და სპონსორობის შესაძლებლობებით“, წერს OCCRP.
PASHA Holding-ის მფლობელია პრეზიდენტის ილჰამ ალიევის ორი ქალიშვილი, ლეილა და არზუ ალიევები, ხოლო ფაშაევი აზერბაიჯანის პირველი ლედის და ვიცე-პრეზიდენტის მეჰრიბან ალიევას ბიძაშვილია.
17 და 20 სექტემბერს გამოცხადდა COP29-ის კიდევ ოთხი ოფიციალური პარტნიორი. მათ შორისაა ტვირთგადამზიდი ოპერატორი Silk Way West Airlines და ტექსტილის ფირმა GILTEX.
OCCRP-მა დაადგინა, რომ ავიაკომპანია ეკუთვნის ყოფილ სამთავრობო მოხელეს ზაურ ახუნდოვს, მაგრამ ასევე ადრე იყო დაკავშირებული ალიევების ოჯახთან შვილობილი კომპანიის მეშვეობით.
2010 წელს რადიოსადგურის ,,თავისუფალი ევროპა“-ს გამოძიებამ დაადგინა, რომ არზუ ალიევა, პრეზიდენტის უმცროსი ქალიშვილი, იყო Silk Way Bank-ის სამი მფლობელიდან ერთ-ერთი, რომელიც Silk Way Group-ის ყოფილი ფინანსური ფრთაა და რომლის ნაწილიც ავიაკომპანიაა.
