სამხრეთ კავკასია ტრამპის პოლიტიკაში ნაკლებ ადგილს დაიკავებს, ვიდრე ბაიდენისა  –  პოლიტოლოგი

სამხრეთ კავკასია დონალდ ტრამპის, როგორც 47-ე პრეზიდენტის პოლიტიკაში უფრო მეტ ადგილს დაიკავებს, ვიდრე მის წინა საპრეზიდენტო ვადაში, მაგრამ ნაკლებ ადგილს, ვიდრე ბაიდენის პოლიტიკაში. ასეთი მოსაზრება პოლიტოლოგმა სურენ სარგსიანმა გამოთქვა NEWS.am-ის გადაცემაში „სიძლიერის ფაქტორი“ ტრამპის პრეზიდენტობის პერიოდში მოვლენების შესაძლო განვითარების თემაზე.

პოლიტოლოგის თქმით, ბაიდენის დროს სამხრეთ კავკასიას აშშ-ს პოლიტიკაში უფრო დიდი ადგილი ეკავა, რაც ასევე იმით იყო განპირობებული, რომ რუსეთს არ ჰქონდა დრო რეგიონული საკითხების გადასაჭრელად. სარგსიანის აზრით, შეიქმნა ვაკუუმი, რომელიც აშშ-მ სწრაფად შეავსო.

წინა პრეზიდენტობის დროს ტრამპის წრეში არ იყო ადამიანები, რომლებიც კარგად იცნობდნენ სამხრეთ კავკასიას, ახლა კი არიან, განაგრძო პოლიტოლოგმა.

 „ეს ის ხალხია, ვინც კარგად იცნობს რეგიონს და ნამყოფიც კი არიან აქ“, – აღნიშნა სარგსიანმა და შეახსენა, რომ ტრამპის ბოლო ორ მესიჯში გამოყენებული იყო სახელწოდება „არცახი“, ტერმინი „ეთნიკური წმენდა“.  „ეს გზავნილები უაღრესად მნიშვნელოვანია სამუშაოს მიმართულებების გააზრების თვალსაზრისით“, – აღნიშნა პოლიტოლოგმა და დასძინა, რომ ეს მნიშვნელოვანია მაშინაც კი, თუ ის ნათქვამი  იყო უბრალოდ  სომეხი ამომრჩევლების ხმების მოსაზიდად. ამრიგად, ტრამპის წინასაარჩევნო განცხადებები კარგი პლაცდარმია შემდგომი მუშაობისთვის, ხაზგასმით აღნიშნა სარგსიანმა.

კითხვაზე გააგრძელებს თუ არა ტრამპის ადმინისტრაცია სომხეთსა და აზერბაიჯანს შორის სამშვიდობო ხელშეკრულების ხელმოწერის საკითხს, პოლიტოლოგმა უპასუხა:

“არა მგონია, რომ ის ამას გააკეთებს ისე, როგორც ბაიდენის ადმინისტრაციამ გააკეთა”, – ფიქრობს პოლიტოლოგი და შეახსენებს, რომ აშშ-სთვის სამხრეთ კავკასიის კონფლიქტის გადაწყვეტა  რუსეთის რეგიონიდან გაძევებაა“.