ბაქოს სამხედრო სასამართლო მთიანი ყარაბაღის სამხედრო და პოლიტიკური ლიდერების საქმეს განიხილავს.
„არმენპრესის“ ინფორმაციით, ამის შესახებ აზერბაიჯანის გენერალურმა პროკურატურამ გაავრცელა განცხადება, რომელშიც აღნიშნა, რომ მათ ბრალი არაერთი მძიმე მუხლით წაუყენეს.
აზერბაიჯანის გენერალურმა პროკურატურამ სომხეთის შესაბამის ორგანოებს მთიანი ყარაბაღის სამხედრო და პოლიტიკური ლიდერების წინააღმდეგ აღძრული სისხლის სამართლის საქმის ფარგლებში თანამშრომლობისკენ მოუწოდა.
აზერბაიჯანის ხელისუფლებამ ბრალი წაუყენა მთიანი ყარაბაღის უმაღლეს ხელმძღვანელობას, რომლებიც უკანონოდ აიყვანეს 2023 წლის სექტემბერში აზერბაიჯანის მიერ განხორციელებული ფართომასშტაბიანი სამხედრო აგრესიის დროს.
ბაქოში უკანონოდ დაკავებულ პირებს შორის არიან მთიანი ყარაბაღის ყოფილი პრეზიდენტები: არკადი ღუკასიანი, ბაკო საჰაკიანი, არაიკ ჰარუთიუნიანი, ასევე ყარაბაღის ყოფილი სახელმწიფო მინისტრი რუბენ ვარდანიანი, პარლამენტის თავმჯდომარე დავით იშხანიანი, თავდაცვის არმიის ყოფილი სარდალი ლევონ მნაცაკანიანი, ყოფილი საგარეო საქმეთა მინისტრი დავით ბაბაიანი, თავდაცვის მინისტრის ყოფილი მოადგილე დავით მანუკიანი.
აზერბაიჯანის დაკავების იზოლატორებში მყოფი პირების ოჯახები და მათი კანონიერი წარმომადგენლები მათი უფლებების უხეშ დარღვევაზე საუბრობენ. ადვოკატების თქმით, დაკავებულები მოკლებულნი არიან სამართლებრივ დაცვას, არ ეძლევათ საშუალება სრულად გაეცნონ წარდგენილ ბრალდებას, ბრალდება ეფუძნება ფაქტობრივად უსაფუძვლო და წინასწარ განზრახულ მტკიცებულებებს.
ვარდანიანის ადვოკატმა ჯარედ გენსერმა განაცხადა, რომ ამ ბრალდებებს პოლიტიკური მოტივი აქვს და მიზნად ისახავს მთიანი ყარაბაღის ხალხისა და მათი ლიდერების მიმართ შურისძიებას.
