ანკარამ განაცხადა, რომ არ არსებობს წინაპირობები თურქეთსა და სომხეთს შორის დიპლომატიური მისიების გახსნისთვის

თურქეთის პრეზიდენტის მთავარმა მრჩეველმა საგარეო პოლიტიკისა და უსაფრთხოების საკითხებში აკიფ ჩაღათაი კილიჩმა აზერბაიჯანულ საინფორმაციო სააგენტო APA-სთან ინტერვიუში განაცხადა, რომ „შექმნილ ვითარებაში არ არსებობს წინაპირობები“ თურქეთსა და სომხეთს შორის დიპლომატიური მისიების გახსნისთვის.

„შექმნილ ვითარებაში ამ საკითხის განხილვის წინაპირობა არ არსებობს. და ამის შესახებ ინფორმაცია არ მაქვს. „კიდევ ერთხელ მინდა აღვნიშნო, რომ ჩვენი პოზიცია ამ პროცესში ცნობილია: აზერბაიჯანსა და სომხეთს შორის სამშვიდობო ხელშეკრულება იქნება მრავალი საკითხის გადაწყვეტის გასაღები“, – განაცხადა ერდოღანის მთავარმა მრჩეველმა, იტყობინება აზერბაიჯანული მედია.

მან ასევე ისაუბრა თურქეთის პოზიციაზე სომხეთთან ურთიერთობის ნორმალიზების პროცესში.

„ჩვენთვის აზერბაიჯანის უსაფრთხოება და მისი ტერიტორიული მთლიანობა ყველაზე მნიშვნელოვანი ფაქტორია. ამ პოზიციიდან საუბრისას, ჩვენ ყურადღებით ვაკვირდებით ყარაბაღის მეორე ომის შემდეგ აზერბაიჯანსა და სომხეთს შორის მიმდინარე პროცესს, სამშვიდობო ხელშეკრულების საკითხს და ვდგამთ შესაბამის ნაბიჯებს. ბუნებრივია, სომხეთთან დისკუსიაში ვართ. არსებობს საერთაშორისო სტრუქტურები, რომლებშიც წარმოდგენილია აზერბაიჯანი, თურქეთი და სომხეთი. „ჩვენ ვმუშაობთ, რომ ვიპოვოთ საუკეთესო გამოსავალი, ერთად ვიაროთ წინ და ვიცხოვროთ მშვიდობიანად“, – განაცხადა კილიჩმა.