ამსტერდამში წმინდა გრიგოლ ნარეკაცის მემორიალური დაფა გაიხსნა
10 მაისს, ამსტერდამის წმინდა ნიკოლოზის საკათედრო ტაძარში, დიდი სომეხი მოაზროვნის, პოეტისა და თეოლოგის, წმინდა გრიგოლ ნარეკაცის მემორიალური დაფის საზეიმო გახსნა გაიმართა, იუწყება Dutch Journal.
ღონისძიებას ესწრებოდნენ სულიწმინდის სომეხთა სამოციქულო ეკლესიის საზოგადოების წევრები, დაძმობილებული ეკლესიების წარმომადგენლები, ასევე ქალაქის სულიერი და კულტურული ლიდერები.
ამ ეკუმენური ცერემონიის დროს დამსწრე საზოგადოებამ მოისმინა ჰაარლემ-ამსტერდამის კათოლიკური ეპარქიის წინამძღვრის, ეპისკოპოს იან ჰენდრიკსის, წმინდა ეჯმიაწინის დედა საკათედრო ტაძრის დელეგატის, მთავარეპისკოპოს ხაჯაკ პარსამიანის, ამსტერდამის დეკანოზის ერიკ ფენისის, ასევე ინიციატივის ავტორების, „წმინდა გრიგოლ ნარეკაცის ამსტერდამის“ ფონდის ხელმძღვანელის, ვაჰან ავაგიანის და პანსომხური გეოგრაფიული საზოგადოების პრეზიდენტის, რაფაელ ჰოვანესიანის მიმართვები.
მონაწილეებმა ხაზი გაუსვეს მემორიალური დაფის ისტორიულ და სულიერ მნიშვნელობას და მას სომხურ საზოგადოებასა და ამსტერდამს შორის კავშირების განმტკიცების სიმბოლოდ მიიჩნევდნენ. აღინიშნა, რომ ნარეკის გამოსახულებით ეს ძეგლი სამშობლოდან შორს მცხოვრები სომხებისთვის მომლოცველობის ადგილი გახდება, ასევე ნიდერლანდებში ჩასული სომეხი ტურისტებისა და ადგილობრივების ყურადღებას მიიპყრობს.
აღნიშნულია, რომ ქალაქის ცენტრში მდებარე წმინდა ნიკოლოზის ტაძრის უნიკალურობა ვიზიტორებს საშუალებას მისცემს არა მხოლოდ გაეცნონ სომხური კულტურის სიმბოლოებს, არამედ სანთელი აანთონ, რითაც პატივი მიაგონ ნარეკაცის უკვდავ ლიტერატურულ მემკვიდრეობას.
„დღეს ჩვენი საზოგადოების გულში ახალი გვერდი იხსნება. წმინდა გრიგოლ ნარეკაცი, თავისი უნივერსალური ჰუმანიტარული და სულიერი გზავნილით, სომხეთსა და ნიდერლანდებს შორის კულტურულ ხიდებს დააკავშირებს“, – თქვა ვაჰან ავაგიანმა.
ღონისძიება მორწმუნეთა ერთობლივი ლოცვით და ტაძარში ნარეკაცის გამოსახულების წინ სანთლების ანთების ტრადიციული ცერემონიით დასრულდა.
