აზერბაიჯანის თავდაცვის მინისტრი თელ-ავივშია: ის ისრაელის თავდაცვის მინისტრს შეხვდა

ისრაელის თავდაცვის მინისტრმა, ისრაელ კაცმა, დღეს თელ-ავივში აზერბაიჯანის თავდაცვის მინისტრი ზაკირ ჰასანოვი მიიღო ორმხრივი უსაფრთხოების თანამშრომლობის გასაძლიერებლად. ამის შესახებ ისრაელის თავდაცვის სამინისტროს განცხადებაშია ნათქვამი, იუწყება The Times of Israel. შეხვედრის დროს კაცმა მაღალი შეფასება მისცა ორ ქვეყანას შორის არსებულ ღრმა სტრატეგიულ ალიანსს და აღნიშნა საერთო ინტერესები და ურთიერთნდობა. მან მადლობა გადაუხადა ჰასანოვს აზერბაიჯანის მხარდაჭერისთვის ჰამასის მიერ 7 ოქტომბრის თავდასხმის შემდეგ, ასევე ისრაელსა და თურქეთს შორის შუამავლობის მცდელობებისთვის. კაცმა ასევე ხაზი გაუსვა ევროვიზიის სიმღერის კონკურსზე აზერბაიჯანის ხმის მიცემის შედეგებს, რომლის შედეგადაც ისრაელმა მაქსიმალური ქულები მიიღო და ეს ორ მთავრობასა და ხალხს შორის მეგობრობის ნამდვილ ნიშნად შეაფასა. განცხადების თანახმად, ორივე მხარე შეთანხმდა თავდაცვის სფეროში თანამშრომლობის გაფართოებაზე. მედია საშუალება წერს, რომ აზერბაიჯანთან უსაფრთხოების კავშირები ისრაელისთვის სტრატეგიულად ითვლება, კასპიის ზღვის ქვეყნის ირანთან სიახლოვის გათვალისწინებით. შეგახსენებთ, რომ მაისის დასაწყისში ისრაელის პრემიერ-მინისტრი ბენიამინ ნეთანიაჰუ აზერბაიჯანში ჩასვლას გეგმავდა, მაგრამ ვიზიტი გაუქმდა, რადგან თურქეთმა მისი საჰაერო სივრცის გამოყენება აკრძალა.