23 ივნისს, საქართველოს შინაგან საქმეთა მინისტრის, გელა გელაძის ხელმძღვანელობით დელეგაცია სამუშაო ვიზიტით სომხეთს ეწვია.
გელა გელაძეს შინაგან საქმეთა სამინისტროში მინისტრი არფინე სარგსიანი დახვდა. გაიმართა ოფიციალური ცერემონია.
საქართველოსა და სომხეთის შინაგან საქმეთა მინისტრებმა ყვავილებით შეამკეს სამშობლოს საზღვრების დაცვისა და სამსახურებრივი მოვალეობის შესრულებისას დაღუპული პოლიციელების ხსოვნისადმი მიძღვნილი მემორიალურ კედელი.
ოფიციალური ცერემონიის შემდეგ, მხარეებს შორის გაფართოებული შეხვედრა გაიმართა.
სომხეთის შინაგან საქმეთა მინისტრი, არფინე სარგსიანი, მიესალმა კოლეგას, მიულოცა მას საქართველოს შინაგან საქმეთა მინისტრად დანიშვნა და ნაყოფიერი და ეფექტური მუშაობა უსურვა.
მინისტრმა სარგსიანმა მაღალი შეფასება მისცა ორი ქვეყნის შინაგან საქმეთა სამინისტროებს შორის ეფექტურ თანამშრომლობას და ხაზგასმით აღნიშნა, რომ გელა გელაძის ვიზიტი პარტნიორობის განმტკიცების კიდევ ერთი მნიშვნელოვანი ნაბიჯია.
არფინე სარგსიანმა წარმოადგინა პოლიციაში, სამაშველო სამსახურსა და მიგრაციისა და მოქალაქეობის სამსახურში განხორციელებული სისტემური რეფორმები, ასევე სომხეთის მიერ ვიზების ლიბერალიზაციისკენ გადადგმული ნაბიჯები, ხაზი გაუსვა ამ კონტექსტში საქართველოს გამოცდილების მნიშვნელობას.
მინისტრი სარგსიანი ასევე შეეხო ორი ქვეყნის სამართალდამცავ უწყებებს შორის დანაშაულის, მათ შორის ნარკოტიკებით უკანონო ვაჭრობის სფეროებში თანამშრომლობასთან დაკავშირებულ რიგ საკითხებს.
საქართველოს შინაგან საქმეთა მინისტრმა გელა გელაძემ, თბილი დახვედრისთვის მადლიერების გამოხატვისას, ხაზგასმით აღნიშნა, რომ ეს მისი პირველი ოფიციალური ვიზიტია მინისტრის რანგში.
მინისტრმა გელაძემ ასევე მაღალი შეფასება მისცა ორ უწყებას შორის ათწლეულების განმავლობაში არსებულ თანამშრომლობას და კიდევ ერთხელ დაადასტურა მისი შემდგომი გაძლიერებისადმი ერთგულება.
გელა გელაძემ აღნიშნა, რომ მისი მოღვაწეობის პერიოდში სომხეთის შინაგან საქმეთა სამინისტროს და მინისტრს მისი სრული მხარდაჭერა ექნება.
საქართველოს შინაგან საქმეთა მინისტრმა წარმოადგინა მისი ხელმძღვანელობით სტრუქტურაში მიმდინარე რეფორმები. გელა გელაძე ასევე შეეხო სომხეთის შინაგან საქმეთა სამინისტროში განხორციელებულ საგანმანათლებლო რეფორმებს და ხაზი გაუსვა სომხეთის გამოცდილებას ამ კონტექსტში. მხარეებმა გამოთქვეს მზადყოფნა, ხელი მოაწერონ ურთიერთგაგების მემორანდუმებს თანამშრომლობის მიმართულებების გარკვევის მიზნით, ასევე გადადგან პრაქტიკული ნაბიჯები დეპარტამენტებს შორის ოპერატიული კომუნიკაციის დამყარების მიმართულებით, რაც მნიშვნელოვნად შეუწყობს ხელს ტრანსნაციონალური დანაშაულის წინააღმდეგ უფრო სწრაფ და ეფექტურ ბრძოლას.
საქართველოს შინაგან საქმეთა მინისტრმა, გელა გელაძემ, თანამშრომლობის გაღრმავების კონტექსტში, არფინე სარგსიანი თბილისში მიიწვია. მინისტრმა სარგსიანმა მიიღო მოწვევა და აღნიშნა, რომ საპასუხო ვიზიტი ასევე ურთიერთობების შემდგომ განვითარებას ისახავს მიზნად.
გაფართოებული ფორმატით შეხვედრის შემდეგ, სომხეთისა და საქართველოს შინაგან საქმეთა მინისტრებმა შეხვედრა ორმხრივ ფორმატში განაგრძეს.
