ევროკავშირი შეშფოთებას გამოთქვამს აზერბაიჯანში ჟურნალისტების დაპატიმრების გამო
ევროკავშირმა ღრმა შეშფოთება გამოთქვა აზერბაიჯანში „აბზას მედიის“ ჟურნალისტებისა და თანამშრომლების მიმართ გამოტანილი განაჩენების გამო და ეს ნაბიჯი ქვეყანაში პრესის თავისუფლებისთვის შემაშფოთებელ სიგნალად შეაფასა.
განაჩენების გამოტანის შემდეგ გამოქვეყნებულ განცხადებაში ევროკავშირმა ხაზი გაუსვა დამოუკიდებელი ჟურნალისტიკის არსებით როლს გამჭვირვალობის, ანგარიშვალდებულებისა და ინფორმირებული საზოგადოების ხელშეწყობაში. განცხადებაში აზერბაიჯანის ხელისუფლებას მოუწოდებენ, პატივი სცენ ადამიანის უფლებებსა და ფუნდამენტურ თავისუფლებებს საერთაშორისო ვალდებულებების შესაბამისად.
„ევროკავშირი მოუწოდებს აზერბაიჯანს, დაუყოვნებლივ გადადგას ნაბიჯები ყველა ჟურნალისტისა და მედიის პროფესიონალისთვის უსაფრთხო და მხარდამჭერი გარემოს უზრუნველსაყოფად“, – ნათქვამია განცხადებაში.
ევროკავშირმა კიდევ ერთხელ დაადასტურა თავისი ერთგულება ადამიანის უფლებების მიმართ და გამოაცხადა, რომ გააგრძელებს დიალოგს ბაქოსთან, კერძოდ, გამოხატვის თავისუფლებისა და მედიის დამოუკიდებლობის საკითხებში.
შვიდ ჟურნალისტს ცოტა ხნის წინ აზერბაიჯანში ხანგრძლივი პატიმრობა მიესაჯა.
სასამართლომ ისინი დამნაშავედ ცნო კონტრაბანდაში, გადასახადებისგან თავის არიდებასა და კრიმინალური გზით მოპოვებული ქონების ლეგალიზაციაში.
