სომხეთი რეგიონული ინფრასტრუქტურის განბლოკვის საკითხს განიხილავს მხოლოდ სომხეთის რესპუბლიკის სუვერენიტეტის, ტერიტორიული მთლიანობისა და იურისდიქციის კონტექსტში. სომხეთმა არ განიხილა და არც განიხილავს თავისი სუვერენული ტერიტორიის კონტროლის რომელიმე მესამე მხარისთვის დელეგირების საკითხს.
Armenpress-ის კითხვებზე პასუხად, ამის შესახებ განაცხადა სომხეთის რესპუბლიკის პრემიერ-მინისტრის პრესმდივანმა ნაზელი ბაღდასარიანმა.
კითხვა: რეგიონული სატრანსპორტო ინფრასტრუქტურის განბლოკვაზე საუბრისას, აშშ-ის ელჩმა თურქეთში ისაუბრა აშშ-ს მიერ სომხეთის რესპუბლიკის სუვერენული ტერიტორიის ნაწილის იჯარით გადაცემის შესაძლებლობაზე, რომლის მეშვეობითაც, ელჩის თქმით, განხორციელდება „ზანგეზურის დერეფანი“. როგორ კომენტარს გააკეთებდით ამ განცხადებაზე?
პასუხი: თქვენს მიერ ნახსენები ნომენკლატურა მიუღებელია სომხეთის რესპუბლიკისთვის. ჩვენ არაერთხელ განვაცხადეთ, რომ სომხეთი რეგიონული ინფრასტრუქტურის განბლოკვის საკითხს მხოლოდ სომხეთის რესპუბლიკის სუვერენიტეტის, ტერიტორიული მთლიანობისა და იურისდიქციის კონტექსტში განიხილავს. სხვა ლოგიკაზე ვერ ვისაუბრებთ. რაც შეეხება მიწის იჯარას, სომხეთის რესპუბლიკის კანონმდებლობის თანახმად, ასეთი ინსტიტუტი მხოლოდ იმ სასოფლო-სამეურნეო მიწებისთვის არსებობს, რომლებზეც სასოფლო-სამეურნეო საქმიანობა ხორციელდება. შესაბამისად, აშშ-ის ელჩის მიერ ნახსენები ვარიანტი შეუძლებელია.
კითხვა: და შესაძლოა აშშ-ის ელჩმა გზის კონტროლის აუთსორსინგი იგულისხმა?
პასუხი: სომხეთის რესპუბლიკამ არ განიხილა და არც განიხილავს საკუთარი სუვერენული ტერიტორიის კონტროლის მესამე მხარისთვის აუთსორსინგის საკითხს. სომხეთის რესპუბლიკის ტერიტორიის არც ერთი ნაწილი არ შეიძლება იყოს სომხეთის რესპუბლიკის ტერიტორიული მთლიანობის, სუვერენიტეტისა და იურისდიქციის გარეთ.
