Euromedia24-თან ინტერვიუში, სომხეთში ირანის ელჩმა მეჰდი სობჰანიმ განაცხადა, რომ თეირანი შეშფოთებულია სიუნიქიში გზის ამერიკული კომპანიისთვის შესაძლო გადაცემის შესახებ განხილვებით. მან ხაზგასმით აღნიშნა, რომ ნებისმიერი ნაბიჯი, რომელსაც შეუძლია შეცვალოს საერთაშორისო საზღვრები, დაარღვიოს ირანსა და სომხეთს შორის სახმელეთო კავშირი ან გამოიწვიოს რეგიონის დესტაბილიზაცია, მიუღებელია. ელჩის თქმით, სომხურმა მხარემ უკვე განაცხადა, რომ არ მიიღებს გადაწყვეტილებებს, რომლებმაც შეიძლება გავლენა მოახდინოს ტერიტორიულ მთლიანობაზე – და ირანი სრულად უჭერს მხარს ამ პოზიციას.
„რამ შეიძლება გამოიწვიოს გეოპოლიტიკური ცვლილებები რეგიონში და ირანსა და სომხეთს შორის სახმელეთო კავშირის დარღვევა, ჩვენთვის სერიოზული შეშფოთების საგანია. ეს ნამდვილად შეიძლება საზიანო იყოს სომხეთისთვის. სწორედ ამიტომ არ არის სომხეთის მთავრობა მზად, ვინმეს დაუშვას ქვეყნის წითელი ხაზების გადაკვეთა“, – აღნიშნა ელჩმა.
მისი თქმით, სომეხ მაღალჩინოსნებთან შეხვედრების დროს მას დაუდასტურეს, რომ ერევანი არ აპირებს გადადგას ნაბიჯები, რომლებმაც შეიძლება დაარღვიონ ქვეყნის ტერიტორიული მთლიანობა და ეროვნული სუვერენიტეტი.
ელჩმა ასევე ყურადღება გაამახვილა სახელმწიფოების ტერიტორიული მთლიანობის შელახვის რიტორიკის ნორმალიზების საფრთხეზე:
„როდესაც ტერიტორიული მთლიანობის დარღვევა ჩვეულებრივ მოვლენად იქცევა, ეს საშიშია არა მხოლოდ რეგიონისთვის, არამედ მთლიანად საერთაშორისო სამართლისთვის“.
სოჰბანის თქმით, სომხეთსა და ირანს შორის ურთიერთობები „ბუნებრივი ალიანსის“ დონეზეა. თუმცა, ქვეყნები მუშაობენ სტრატეგიული ყოვლისმომცველი შეთანხმების მომზადებაზე, რომელსაც მომავალში უმაღლეს დონეზე მოეწერება ხელი.
„სადაც დავინახავთ, რომ თანამშრომლობა ორივე ქვეყნის ინტერესებს შეესაბამება, ჩვენ ამ სფეროებს განვავითარებთ. ჩვენი თანამშრომლობა არ არის მიმართული მესამე ქვეყნების წინააღმდეგ – ეს ჩვენი საერთო ინტერესებიდან გამომდინარეობს“, – დასძინა მან.
ასევე ცნობილი გახდა, რომ ამჟამად მიმდინარეობს მზადება ირანის პრეზიდენტის მასუდ პეზეშკიანის სომხეთში ვიზიტისთვის, რომელიც მიმდინარე წლის ზაფხულშია დაგეგმილი.
