„ტრამპის გზა“ სომხური კანონმდებლობის ფარგლებში იმუშავებს: Reuters-ი ვაშინგტონში დაგეგმილი შეხვედრის ახალ დეტალებს ავლენს
აშშ-ის პრეზიდენტი დონალდ ტრამპი პარასკევს თეთრ სახლში სომხეთისა და აზერბაიჯანის ლიდერებს უმასპინძლებს, რაც დაგვირგვინდება სამშვიდობო ჩარჩო შეთანხმების ხელმოწერით, რომელიც მოიცავს აშშ-ს ექსკლუზიურ უფლებებს სამხრეთ კავკასიაში სტრატეგიული სატრანზიტო დერეფნის გავლაზე, განუცხადეს ოფიციალურმა პირებმა Reuters-ს.
სამშვიდობო ჩარჩო შეთანხმებას შეუძლია გარდაქმნას სამხრეთ კავკასია. ენერგომომარაგების რეგიონი, რომელიც ესაზღვრება რუსეთს, ევროპას, თურქეთს და ირანს, ნავთობისა და გაზის მილსადენებით გადაკვეთილი, მაგრამ გაყოფილი დახურული საზღვრებითა და დიდი ხნის ეთნიკური კონფლიქტებით.
აშშ-ის ოფიციალურმა პირებმა, ანონიმურობის პირობით, განაცხადეს, რომ აზერბაიჯანის პრეზიდენტი ილჰამ ალიევი და სომხეთის პრემიერ-მინისტრი ნიკოლ ფაშინიანი, სავარაუდოდ, შეუერთდებიან ტრამპს თეთრ სახლში მოლაპარაკებებისა და ხელმოწერის ცერემონიისთვის.
ოფიციალური პირების თქმით, ისინი ხელს მოაწერენ ჩარჩო დოკუმენტს, რომელიც მიზნად ისახავს „მშვიდობისკენ მიმავალი კონკრეტული გზის“ მიღწევას და დიდი ხნის განმავლობაში არსებული სატრანზიტო საკითხის მოგვარებას.
„როიტერი“ წერს: „აზერბაიჯანმა მოითხოვა სატრანსპორტო დერეფნის მშენებლობა სომხეთის გავლით, რომელიც მისი ტერიტორიის უმეტეს ნაწილს დააკავშირებს ნახიჩევანთან, აზერბაიჯანულ ანკლავთან, რომელიც ბაქოს მოკავშირე თურქეთს ესაზღვრება. პარასკევს ლიდერების მიერ ხელმოწერილი დოკუმენტების ფრთხილად შეთანხმებული ნაწილის თანახმად, სომხეთი გეგმავს შეერთებულ შტატებს მიანიჭოს ექსკლუზიური სპეციალური განვითარების უფლებები ხანგრძლივი პერიოდის განმავლობაში სატრანზიტო დერეფანზე, რომელსაც ეწოდება „ტრამპის მარშრუტი: გზა საერთაშორისო მშვიდობისა და კეთილდღეობისკენ“ და ცნობილი იქნება აკრონიმით TRIPP.
ოფიციალური პირების თქმით, მარშრუტი იმუშავებს სომხეთის კანონმდებლობის შესაბამისად და შეერთებული შტატები მიწას ინფრასტრუქტურისა და მართვისთვის კონსორციუმს ქვეიჯარით გადასცემს“. „ეს ნაბიჯი რეგიონს ვაჭრობისთვის გახსნის და შემდგომ სამხედრო ქმედებებს თავიდან აიცილებს“, – თქვა ერთ-ერთმა ოფიციალურმა პირმა.
მათ აღნიშნეს, რომ სომხეთისა და აზერბაიჯანის ლიდერები ასევე ხელს მოაწერენ დოკუმენტებს, რომლებიც მოითხოვენ მინსკის ჯგუფის დაშლას, რომელსაც 1992 წელს კონფლიქტის შუამავლობისთვის ერთობლივად ხელმძღვანელობენ საფრანგეთი, რუსეთი და შეერთებული შტატები.
მედია საშუალება წერს, რომ სომხეთ-აზერბაიჯანის საკითხში პროგრესი მარტში დაიწყო, როდესაც აშშ-ის სპეციალური წარმომადგენელი სტივ ვიტკოფი რეგიონს ეწვია. მისი გუნდის წევრები მას შემდეგ რამდენჯერმე იმყოფებოდნენ იქ შეთანხმების ხელმოწერის ხელშესაწყობად. თეთრ სახლში შეხვედრა გაიმართება იმავე დღეს, როდესაც ტრამპმა რუსეთის პრეზიდენტ ვლადიმერ პუტინს დააკისრა ვადა, რათა დაეთანხმოს უკრაინაში შეჭრის შესაჩერებლად გადადგმულ ნაბიჯებს, წინააღმდეგ შემთხვევაში მას დამატებითი ეკონომიკური სანქციები დაეკისრება. აღსანიშნავია, რომ ვაშინგტონში მცხოვრებმა აზერბაიჯანელმა ჟურნალისტმა ალექს რაუფოღლუმ ვაშინგტონში შეხვედრისა და ხელმოსაწერი დოკუმენტების დეტალები გაზეთ „კიევ პოსტში“ გამოქვეყნებულ სტატიაში გაავრცელა.
