არარატ მირზოიანი ტელეფონით ესაუბრა სერგეი ლავროვს
რუსეთის საგარეო საქმეთა სამინისტროს პრესსამსახურის ცნობით, სომხური მხარის ინიციატივით, რუსეთის საგარეო საქმეთა მინისტრი სერგეი ლავროვი ტელეფონით ესაუბრა სომხეთის საგარეო საქმეთა მინისტრ არარატ მირზოიანს.
„სრ საგარეო საქმეთა მინისტრმა ლავროვს მიაწოდა ინფორმაცია სომხეთის პრემიერ-მინისტრ ნიკოლ ფაშინიანის, აშშ-ის პრეზიდენტ დონალდ ტრამპის და აზერბაიჯანის პრეზიდენტ ილჰამ ალიევის კონტაქტების დეტალების შესახებ. სერგეი ლავროვმა ხაზი გაუსვა ბაქოსა და ერევანს შორის მდგრადი მშვიდობის მიღწევის მნიშვნელობას 2020-2022 წლებისთვის უმაღლეს დონეზე მიღწეული სამმხრივი შეთანხმებების შესაბამისად, სადაც რუსეთს ცენტრალური როლი ეკისრება. აღინიშნა მოსკოვის მზადყოფნა, წვლილი შეიტანოს აზერბაიჯანსა და სომხეთს შორის ურთიერთობების ყოვლისმომცველი ნორმალიზაციის საქმეში“, – ნათქვამია განცხადებაში.
ასევე განიხილეს რუსეთ-სომხეთის დღის წესრიგის რამდენიმე აქტუალური საკითხი. სომხეთის საგარეო საქმეთა სამინისტრომ სატელეფონო საუბრის შესახებ განცხადება გაავრცელა, რომელშიც ნათქვამია: „ორ ქვეყანას შორის მოლაპარაკებების შემდეგ, არარატ მირზოიანმა თავის რუს კოლეგას 8 აგვისტოს ვაშინგტონში მიღწეული შეთანხმებები გააცნო, კერძოდ, სომხეთსა და აზერბაიჯანს შორის სამშვიდობო ხელშეკრულების პარაფირება, ეუთოს მინსკის პროცესისა და მასთან დაკავშირებული სტრუქტურების დაშლის შესახებ ერთობლივი განაცხადი, ასევე ხაზი გაუსვა რეგიონული კომუნიკაციების განბლოკვის საკითხში დადასტურებულ ფუნდამენტურ პრინციპებს.
მინისტრმა მირზოიანმა მადლობა გადაუხადა რუსეთის საგარეო საქმეთა მინისტრის მილოცვებსა და მხარდაჭერას ამ მნიშვნელოვან ეტაპთან დაკავშირებით. თანამოსაუბრეებმა ასევე ისაუბრეს სომხეთსა და რუსეთს შორის ორმხრივი თანამშრომლობის საკითხებზე“.
