ბოლო წლებში სომხეთმა მიაღწია იმ ეტაპს, როდესაც მისი ურთიერთობები რუსეთთან ჭეშმარიტად პარტნიორულ ურთიერთობებად იქცა.
“Armenpress”-ის ცნობით, RTVI-თან ინტერვიუში ამის შესახებ განაცხადა სომხეთის პრეზიდენტმა ვაჰაგნ ხაჩატურიანმა.
“ახლა რუსეთთან სრულიად განსხვავებული ურთიერთობებია, ეს ჭეშმარიტად პარტნიორული ურთიერთობებია. რუსეთსა და სომხეთს შორის ურთიერთობები არ არის უმცროსი და უფროსი ძმის ურთიერთობები, არამედ უბრალოდ პარტნიორული ურთიერთობები. ეს არის ის, რასაც ჩვენ რეალურად მივაღწიეთ ბოლო 4 წლის განმავლობაში”, – თქვა ხაჩატურიანმა.
ხაჩატურიანის თქმით, ერევანს სურს, რომ მისმა რუსმა პარტნიორებმა გაითვალისწინონ სომხეთის ხელისუფლების დამოუკიდებელი გადაწყვეტილებები.
“სომხეთის ხელისუფლება მუშაობს სომხეთის, სომხეთის რესპუბლიკის ხალხის კეთილდღეობისა და აღორძინებისთვის. ამიტომ, სომხეთის მთავრობამ, ხელისუფლებამ დამოუკიდებლად უნდა გადაწყვიტოს, ვისთან ივაჭროს და ჰქონდეს დიპლომატიური ურთიერთობები”, – აღნიშნა სომხეთის რესპუბლიკის პრეზიდენტმა.
ვაჰაგნ ხაჩატურიანმა ასევე მოიხსენია რუსეთის ვიცე-პრემიერ მინისტრის, ალექსეი ოვერჩუკის განცხადება, რომ „სომხეთმა არჩევანი უნდა გააკეთოს ევრაზიულ ეკონომიკურ კავშირსა და ევროკავშირს შორის, რადგან ერთდროულად ორ სკამზე ჯდომა შეუძლებელია“. რუსეთის ვიცე-პრემიერმა ეს განცხადება რამდენჯერმე გააკეთა სხვადასხვა პლატფორმაზე მას შემდეგ, რაც სომხეთის პარლამენტმა მიიღო კანონი ევროკავშირში გაწევრიანების პროცესის დაწყების შესახებ.
სომხეთის პრეზიდენტმა განაცხადა, რომ ოვერჩუკს უნდა ჰკითხოთ, რას გულისხმობს „ორ სკამზე ჯდომაში“. „ნებისმიერ შემთხვევაში, ახლა არავინ არაფერს გვეუბნება და ჩვენ არაფერს ვარღვევთ. ჩვენ ვმუშაობთ ევრაზიული ეკონომიკური კავშირის ფარგლებში არსებული პირობებით. ჩვენ ვმუშაობთ ევროკავშირში არსებული ეკონომიკური პირობებით და ჯერჯერობით არანაირი პრობლემა არ ყოფილა. ზოგადად, რა საჭიროა ახლა ამაზე საუბარი, რა საჭიროა საკითხის ასე მკვეთრად დაყენება? რატომ წარუდგენს ოვერჩუკი ამ საკითხს რუს საზოგადოებას სხვაგვარად? არსებობს სავაჭრო შეთანხმებები, არსებობს გარკვეული შეთანხმებები. „მუშაობენ ისინი? დიახ, მუშაობენ“, – თქვა ვაჰაგნ ხაჩატურიანმა.
