სომხეთის რესპუბლიკა არ იღებს აზერბაიჯანის წინაპირობას კონსტიტუციის შეცვლის შესახებ სამშვიდობო ხელშეკრულების საბოლოო ხელმოწერისთვის.
მირზოიანმა ეს განცხადება ეუთოს მოქმედ თავმჯდომარესთან, ფინეთის საგარეო საქმეთა მინისტრ ელინა ვალტონენთან ერთობლივ პრესკონფერენციაზე გააკეთა.
„საჭიროდ მიმაჩნია აღვნიშნო, რომ როგორც ადრე, ასევე ახლაც, ჩვენს განხილვებში ურთიერთშეთანხმებული დღის წესრიგის ნაწილი ასეთი საკითხი არ არსებობს. სომხეთის კონსტიტუციის შეცვლისა და ახალი კონსტიტუციის მიღების საკითხი მხოლოდ შიდა პოლიტიკური დღის წესრიგის საკითხია და ჩვენი ხალხის გადასაწყვეტია. სომხეთს არასდროს აუღია და არც აიღებს ვალდებულებას მესამე მხარის წინაშე შეცვალოს თავისი კონსტიტუცია. აზერბაიჯანი კვლავაც მიიჩნევს ამას ხელშეკრულების ხელმოწერის პირობად, ჩვენ არ ვეთანხმებით ამ წინაპირობას“, – თქვა მირზოიანმა.
არარატ მირზოიანმა შეახსენა, რომ სომხეთმა და აზერბაიჯანმა უკვე დაიწყეს სამშვიდობო ხელშეკრულების ხელმოწერისთვის ეუთოს მინსკის ჯგუფის დაშლის პროცესი.
