სომხეთის განათლების, მეცნიერების, კულტურისა და სპორტის მინისტრმა თავის ქართველ კოლეგასთან ორმხრივი ინტერესის მქონე არაერთი საკითხი განიხილა

სომხეთის რესპუბლიკის განათლების, მეცნიერების, კულტურისა და სპორტის მინისტრმა, ჟანა ანდრეასიანმა, მიიღო საქართველოს განათლების, მეცნიერებისა და ახალგაზრდობის მინისტრის, გივი მიკანაზეს ხელმძღვანელობით დელეგაცია, რომელიც სომხეთში „აკადემიური ქალაქი სომხეთი: ცოდნის საერთაშორისო ფორუმ“-ში მონაწილეობის მისაღებად ჩავიდა. შეხვედრას ასევე ესწრებოდა მინისტრის მოადგილე არტურ მარტიროსიანი.

„არმენპრეს“-ის ცნობით, განათლების, მეცნიერებისა და ახალგაზრდობის სამინისტრო იტყობინება, რომ ჟანა ანდრეასიანი  მიესალმა კოლეგას და ხაზი გაუსვა სომხეთ-საქართველოს მეგობრული თანამშრომლობის მნიშვნელობას განათლების, მეცნიერებისა და სპორტის  სფეროებში ერთობლივი პროგრამების განხორციელების შესაძლებლობების განვითარებისა და გაფართოების თვალსაზრისით. საქართველოს განათლების, მეცნიერებისა და ახალგაზრდობის მინისტრმა, გივი მიკანაზემ, მადლობა გადაუხადა მიღებისთვის და იმედი გამოთქვა, რომ შეხვედრა თანამშრომლობის ახალი შესაძლებლობების სტიმულს მისცემს.

ჟანა ანდრეასიანმა აღნიშნა, რომ სომხეთში განათლების სექტორი რეფორმების აქტიურ ფაზაშია და ძალიან მნიშვნელოვანია გამოცდილების გაცვლა ზოგადი განათლების სტანდარტებისა და სასწავლო გეგმის შემუშავების, საგანმანათლებლო ლიტერატურის მომზადების, მასწავლებლების შესაძლებლობების გაძლიერების, ასევე უმაღლესი განათლებისა და მეცნიერების სისტემაში.

მხარეებმა ისაუბრეს საქართველოში სომხური სკოლებისთვის სომხური ენისა და ლიტერატურის სახელმძღვანელოებით უზრუნველყოფასა და სომხურ სკოლებში ქართულის, როგორც უცხო ენის, სწავლებაზე. ხაზი გაესვა თანამშრომლობის განვითარებას, განსაკუთრებით უმაღლესი განათლებისა და მეცნიერების სფეროში, კერძოდ, ევროკავშირის Erasmus+ პროგრამის ფარგლებში. მხარეებმა ისაუბრეს ტექნოლოგიური განათლების განვითარებისკენ მიმართულ პოლიტიკასა და სამუშაოებზე და ხაზი გაუსვეს, რომ ეს ორივე ქვეყანაში პრიორიტეტულია.