სომხეთი და აშშ ამჟამად მუშაობენ TRIPP პროექტის განხორციელებაზე: ფაშინიანი
სომხეთის რესპუბლიკა და შეერთებული შტატები მუშაობენ TRIPP პროექტისა და ვაშინგტონში მიღწეული სხვა შეთანხმებების განხორციელებაზე.
Armenpress-ის ცნობით, ამის შესახებ თბილისში გამართულ „აბრეშუმის გზის“ მე-5 ფორუმზე თავის გამოსვლაში განაცხადა სომხეთის რესპუბლიკის პრემიერ-მინისტრმა ნიკოლ ფაშინიანმა.
პრემიერ-მინისტრმა ფაშინიანმა, სამხრეთ კავკასიაში სატრანსპორტო კომუნიკაციების განბლოკვის თემაზე საუბრისას, ციტატად მოიყვანა 8 აგვისტოს ვაშინგტონში სომხეთსა და აზერბაიჯანს შორის აშშ-ის შუამავლობით ხელმოწერილი შეთანხმებები.
„სომხეთის რესპუბლიკა იმუშავებს შეერთებულ შტატებთან და ორმხრივად შეთანხმებულ მესამე მხარეებთან ერთად, რათა განსაზღვროს კომუნიკაციის განხორციელების ჩარჩო სომხეთის რესპუბლიკის ტერიტორიაზე პროექტის „ტრამპის მარშრუტი საერთაშორისო მშვიდობისა და კეთილდღეობისათვის“, ანუ TRIPP-ის ფარგლებში. ჩვენ ვადასტურებთ ჩვენს გადაწყვეტილებას კეთილსინდისიერად მივიღოთ ყველა საჭირო ზომა ამ მიზნის რაც შეიძლება სწრაფად მისაღწევად“, – განაცხადა პრემიერ-მინისტრმა და დაადასტურა, რომ ერევანი და ვაშინგტონი ამჟამად ძალისხმევას ახორციელებენ მიღწეული შეთანხმებების რეალიზაციის მიმართულებით.
2025 წლის 8 აგვისტოს ვაშინგტონში სომხეთის პრემიერ-მინისტრმა ნიკოლ ფაშინიანმა, აზერბაიჯანის პრეზიდენტმა ილჰამ ალიევმა და აშშ-ის პრეზიდენტმა დონალდ ტრამპმა ხელი მოაწერეს დეკლარაციას. დეკლარაციამდე სომხეთისა და აზერბაიჯანის საგარეო საქმეთა მინისტრებმა ხელი მოაწერეს სამშვიდობო შეთანხმების წინასწარ ვერსიას და ერთობლივი წერილით მიმართეს ეუთოს მინსკის ჯგუფის ლიკვიდაციის საკითხზე. იმავე დღეს სომხეთმა აშშ-სთან ორმხრივი თანამშრომლობის მემორანდუმებსაც მოაწერა ხელი.
