საზოგადოებრივი მომსახურების მარეგულირებელმა კომისიამ მიიღო გადაწყვეტილება სომხური ელექტროქსელების ლიცენზიის შეწყვეტის შესახებ
სომხეთის საზოგადოებრივი მომსახურების მარეგულირებელმა კომისიამ მიიღო გადაწყვეტილება კომპანია „სომხეთის ელექტროქსელების“ ლიცენზიის შეწყვეტის შესახებ.
Armenpress-ის ცნობით, კომისიის გადაწყვეტილების პროექტი კენჭისყრაზე 17 ნოემბერს გავიდა.
პროექტი კომისიაში რამდენიმე დღის განმავლობაში განიხილებოდა.
2025 წლის 18 ივნისს, სომხეთის პრემიერ-მინისტრმა ნიკოლ ფაშინიანმა განაცხადა, რომ „სომხეთის ელექტროქსელების“ სახელმწიფო საკუთრებაში გადაცემის დრო დადგა.
2025 წლის ივლისში, სომხეთის პარლამენტმა მეორე მოსმენით და სრულად მიიღო საკანონმდებლო ინიციატივა, რომელიც მიზნად ისახავდა „სომხეთის ელექტროქსელების“ სახელმწიფო საკუთრებაში გადაცემას, რამაც საზოგადოებრივი მომსახურების მარეგულირებელ კომისიას ახალი უფლებამოსილებები მისცა. კერძოდ, კანონი ითვალისწინებს, რომ თუ ლიცენზირებული ორგანიზაციის საქმიანობა მაღალი რისკის შემცველია, მთავრობის უფლებამოსილ ორგანოს შეუძლია წარადგინოს ანგარიში, უზრუნველყოს პრევენციული ზომების გამოყენება სამართალწარმოების დაწყებამდე, დააზუსტოს ამ ზომების ტიპები, მათი გამოყენების პროცედურა და კანონიერების პირობები.
18 ივლისს, საზოგადოებრივი მომსახურების მარეგულირებელი კომისიის თავმჯდომარის, მესროპ მესროპიანის გადაწყვეტილებით, რომანოს პეტროსიანი დაინიშნა „სომხეთის ელექტროქსელების“ დროებით ადმინისტრატორად.
„სომხეთის ელექტროქსელების“ მფლობელია კომპანიების ჯგუფი „ტაშირ კაპიტალი“, რომელმაც „სომხეთის ელექტროქსელებში“ დროებითი ადმინისტრატორის დანიშვნის გადაწყვეტილება სტოკჰოლმის საარბიტრაჟო სასამართლოში გაასაჩივრა.
