ევროკავშირის 27 წევრმა სახელმწიფომ, მათ შორის უნგრეთმა, ევროკავშირის სამშვიდობო ფონდიდან სომხეთისთვის 20 მილიონი ევროს ოდენობის დახმარება დაამტკიცა. გადაწყვეტილება დღეს ევროკავშირის საბჭოს სხდომაზე მიიღეს, იტყობინება რადიო თავისუფლების წყაროები ბრიუსელიდან.
სომხეთმა გასულ წელს ფონდიდან დახმარების განაცხადი წარადგინა, მაგრამ ბუდაპეშტმა დაბლოკა. ქვეყნის საგარეო საქმეთა მინისტრმა პეტერ სიიარტომ განაცხადა, რომ უნგრეთი არ იყო წინააღმდეგი სომხეთისთვის დახმარების მიღების, იმ პირობით, რომ იგივე ოდენობის დახმარება აზერბაიჯანსაც გაეწევა. თუმცა, დიპლომატიური შეხვედრებისა და კულისებში გამართული მოლაპარაკებების შემდეგ, უნგრეთმა პოზიცია შეცვალა.
ეს მეორე შემთხვევაა, როდესაც სომხეთმა ევროპული ფონდიდან დახმარება მიიღო. პირველი 2024 წლის ივლისში 10 მილიონი ევროს ოდენობით გამოიყო საველე მოდულური ბანაკის შესაქმნელად, რომელიც ასევე მოიცავდა სამედიცინო ამბულატორიულ კლინიკას, ასევე შესაბამის მომსახურებასა და შესაძლებლობებს. ამჯერად თანხა გაორმაგდა, პრიორიტეტი კი სომხეთის შეიარაღებული ძალებისა და თავდაცვის შესაძლებლობების გაძლიერებაა ლოჯისტიკისა და სამედიცინო აღჭურვილობის, ასევე საჭირო ტექნიკური მომზადების უზრუნველყოფით. თანხა მომდევნო 35 თვისთვისაა განკუთვნილი.
ევროკავშირის მშვიდობის ფონდი 2021 წელს შეიქმნა მსოფლიოში კონფლიქტების თავიდან ასაცილებლად და გაჭირვებული ქვეყნებისთვის არალეტალური იარაღის მიწოდების მიზნით.
