TRIPP პროექტით გათვალისწინებული რკინიგზის მართვის შესაძლო კონცესიით გადაცემის საკითხში სომხეთი მხოლოდ სახელმწიფო ინტერესებით ხელმძღვანელობს. Armenpress-ის ცნობით, ამის შესახებ ჟურნალისტებთან ბრიფინგზე განაცხადა ეკონომიკის მინისტრმა გევორგ პაპოიანმა.
„მსოფლიოში არსებობენ ქვეყნები, რომლებსაც ძალიან კარგი ურთიერთობები აქვთ როგორც შეერთებულ შტატებთან, ასევე სომხეთთან, ასევე რუსეთთან და ჩემი აზრით, ფულიც აქვთ. პრემიერ-მინისტრმა ამ მექანიზმზე ისაუბრა“, – აღნიშნა პაპოიანმა, ჟურნალისტის კითხვაზე პასუხის გაცემისას, უპასუხა თუ არა რუსეთმა პრემიერ-მინისტრის განცხადებას რკინიგზის კონცესიით მართვის მესამე ქვეყნისთვის გადაცემის შესაძლებლობის შესახებ, ასევე იყო თუ არა ამ საკითხზე რუსულ მხარესთან მოლაპარაკებები.
მინისტრმა ხაზგასმით აღნიშნა, რომ ინიციატივა არცერთი ქვეყნის წინააღმდეგ არ არის მიმართული.
„ეს არ არის რუსეთის წინააღმდეგ, ეს სომხეთისთვისაა. თუ რუსეთს შეუძლია ამ ინვესტიციების განხორციელება და რუსული მხარე შეძლებს ამ სისტემის მომსახურებას ისე, რომ ამ ტვირთებმა სომხეთში გაიაროს და ჩვენ ამისგან პოლიტიკური, ეკონომიკური და უსაფრთხოების სარგებელი გვექნება, ჩვენ პრობლემა არ გვაქვს“, – თქვა მან. პაპოიანის თქმით, სომხეთი, ნებისმიერ შემთხვევაში, საკუთარ ინტერესებს მიანიჭებს უპირატესობას.
„როდესაც სომხეთისა და აშშ-ის ინტერესები წამოიჭრება, ჩვენ დავიცავთ სომხეთის ინტერესებს, სომხეთისა და რუსეთის ინტერესებს, დავიცავთ სომხეთის, სომხეთ-ევროკავშირის, სომხეთ-ჩინეთის, სომხეთ-ირანის ინტერესებს… ჩვენ ყველას პატივს ვცემთ, მაგრამ ნებისმიერ შემთხვევაში, როდესაც სომხეთისა და ნებისმიერი მეგობრის, პარტნიორის ან სტრატეგიული მოკავშირის ინტერესებს ერთ სასწორზე დასვამთ, მეორეზე, ჩვენს ინტერესებს მივანიჭებთ უპირატესობას“, – ხაზგასმით აღნიშნა პაპოიანმა.
მინისტრმა ასევე ხაზი გაუსვა პროექტის ეკონომიკურ მნიშვნელობას სომხეთისთვის.
„ჩვენთვის ძალიან მნიშვნელოვანია, რომ ტვირთი აზერბაიჯანიდან შემოვიდეს, სომხეთში შევიდეს, შემდეგ ისევ აზერბაიჯანში, შემდეგ ისევ სომხეთში, შემდეგ კი თურქეთში წავიდეს. სომხეთის რესპუბლიკის ინტერესები ამას მოითხოვს. და სწორედ ამიტომ, თუ ამა თუ იმ ქვეყანასთან მოლაპარაკება დაგვჭირდება, უნდა ვეცადოთ ამის გაკეთება“, – ხაზგასმით აღნიშნა პაპოიანმა.
ჟურნალისტის კითხვაზე: თუ რუსეთი შეძლებს რკინიგზის სრულად უზრუნველყოფას, მზად არის თუ არა სომხეთი, მისი მართვის უფლება რუსულ მხარეს დაუთმოს, პაპოიანმა უპასუხა:
„ეს არ არის რაიმე ქვეყნის წინააღმდეგ მიმართული ნაბიჯი. ეს პროსომხური მიდგომაა. თუ ჩვენი ინტერესები ამ პროსომხობაშია უზრუნველყოფილი, ჩვენთვის განსხვავება არ არის. მაგრამ დღეს, სამწუხაროდ, ვხედავთ, რომ სიტუაცია ისეთია, რომ ჩვენი ზოგიერთი პარტნიორი ერთმანეთთან საერთო ენას ვერ პოულობს. ამ პირობებში, ჩვენც უნდა ვეცადოთ, როგორმე გადავჭრათ ჩვენი პრობლემები“.
