სომხეთი ინტერნეტის თავისუფლების გლობალურ რეიტინგში 97-ე ადგილზეა, აზერბაიჯანი კი – 121-ე
Cloudwards-ის მიერ შედგენილ ინტერნეტის თავისუფლების რეიტინგში სომხეთმა 100-დან 56 ქულა მიიღო და 164 ქვეყნიდან 97-ე ადგილზეა. საქართველომ უფრო მაღალი ქულა – 64 ქულა (81-ე ადგილი) მიიღო, ხოლო აზერბაიჯანი მნიშვნელოვნად დაბალი – 36 ქულით 121-ე ადგილზეა. ირანი 4 ქულით 163-ე ადგილზეა და მხოლოდ ჩრდილოეთ კორეას ჩამორჩება, რომელსაც ნული ქულა აქვს.
რეიტინგში გათვალისწინებულია პოლიტიკური და სამოქალაქო შეხედულებების თავისუფლად გამოხატვის შესაძლებლობა ონლაინ, ასევე VPN სერვისების, ტორენტ საიტების და ზრდასრულთათვის განკუთვნილი კონტენტის ხელმისაწვდომობა.
რეიტინგში რუსეთმაც 4 ქულა მიიღო და ინტერნეტის თავისუფლების მხრივ მსოფლიოში ყველაზე ცუდ ქვეყნებს შორის ირანთან და ჩინეთთან ერთად იყოფა.
ინტერნეტის თავისუფლების ყველაზე მაღალი დონე 11 ქვეყანამ აჩვენა, რომლებმაც 100-დან 92 ქულა მიიღეს. მათ შორის არიან ბელგია, დანია, ისლანდია, ახალი ზელანდია, ნორვეგია, სლოვაკეთი და ფინეთი. ამ ქვეყნებში არ არსებობს შეზღუდვები სიტყვის თავისუფლებასა და სოციალურ ქსელებზე წვდომაზე. თუმცა, ამ ქვეყნებში არსებობს ცალკეული პრობლემები, რომლებიც დაკავშირებულია ტორენტ რესურსებთან.
