სომხეთი არ აპირებს რუსეთის ზურგს უკან რკინიგზის კონცესიური მართვის სხვა ქვეყნისთვის გადაცემის საკითხის განხილვას: ფაშინიანი
სომხეთის პრემიერ-მინისტრმა ნიკოლ ფაშინიანმა განაცხადა, რომ სომხეთი არ აპირებს რუსეთის ზურგს უკან სომხეთის რკინიგზის ქსელის კონცესიური მართვის სხვა ქვეყნისთვის გადაცემის საკითხის განხილვას.
Armenpress-ის ცნობით, ამის შესახებ ჟურნალისტებთან ბრიფინგზე განაცხადა სომხეთის პრემიერ-მინისტრმა ნიკოლ ფაშინიანმა, უპასუხა რა იმ კითხვაზე, ემზადება თუ არა სომხეთი ერევანში მყოფ ყაზახეთის საგარეო საქმეთა მინისტრის დელეგაციასთან სომხეთის რკინიგზის ქსელის კონცესიური მმართველის, რუსეთის შეცვლის საკითხის განსახილველად.
„ჩვენ არ ვაპირებთ რუსეთის ზურგს უკან არაფრის გაკეთებას. ამ ეტაპზე, სანამ დიალოგის შესაძლებლობები ფართო და ღიაა, ჩვენ გავაგრძელებთ ჩვენს მუშაობას“, – დასძინა ფაშინიანმა.
ადრე ფაშინიანმა განაცხადა, რომ 1 აპრილს მოსკოვში ვიზიტის დროს მან რუს კოლეგებთან დეტალურად განიხილა სომხეთის რკინიგზის ქსელის კონცესიური მართვის სხვა ქვეყნისთვის გადაცემის საკითხი, რომელსაც სომხეთთან და რუსეთთან მეგობრული ურთიერთობები აქვს.
სომხეთის რკინიგზის ქსელის კონცესიური მართვის სომხეთისა და რუსეთისთვის მისაღებ ქვეყანაზე გადაცემის წინადადება ადრე სომხეთის რესპუბლიკის პრემიერ-მინისტრმა ნიკოლ ფაშინიანმა გააკეთა და აღნიშნა, რომ რუსული მხარის მართვის პირობებში, სომხეთის რკინიგზა მოკლებულია გარკვეულ კონკურენტულ უპირატესობებს, რადგან არსებობენ ქვეყნები, რომლებიც უარს ამბობენ სომხეთის რკინიგზის შესაძლებლობების გამოყენებაზე, რადგან მას რუსეთი მართავს.
რუსეთის ვიცე-პრემიერმა ალექსეი ოვერჩუკმა 2 აპრილს განაცხადა, რომ არ არსებობს ობიექტური მიზეზი სომხეთის რკინიგზის ქსელის კონცესიური მართვის მესამე ქვეყნისთვის მიყიდვისთვის.
ადრე სომხურ პრესაში გავრცელდა ხმები, რომ მიმდინარეობს დისკუსიები რუსეთისთვის კონცესიური მართვის ქვეშ გადაცემული სომხეთის რკინიგზის ქსელის მართვის ყაზახეთისთვის გადაცემის შესახებ. ჟურნალისტებთან ბრიფინგის დროს, სომხეთის რესპუბლიკის პრემიერ-მინისტრი ნიკოლ ფაშინიანიც შეეხო ამ თემას.
„ჩვენ წინააღმდეგი არ ვიქნებით, თუ აღმოჩნდება, რომ ჩვენსა და რუსეთს შორის არსებობს ურთიერთგაგება, რომ ყაზახური კომპანია ორივესთვის მისაღებია. ახლა მოლაპარაკებები ცოტა სხვაგვარად მიმდინარეობს, რადგან რუს პარტნიორებს ჯერ არ უთქვამთ: „კარგი, გავაკეთოთ ეს“. „ასეთი იდეები არსებობს, მაგრამ ისინი ჯერ კიდევ მხოლოდ განსახორციელებელი იდეებია“, – განაცხადა პრემიერ-მინისტრმა.
8 აპრილს ოფიციალური ვიზიტით სომხეთს ეწვია ყაზახეთის რესპუბლიკის საგარეო საქმეთა მინისტრი, ერმეკ კოშერბაევი. დელეგაციაში ასევე შედის ყაზახეთის ტრანსპორტის მინისტრი, ნურლან საურანბაევი.
