სომხეთის პრემიერ-მინისტრის პრესმდივანმა, ნაზელი ბაღდასარიანმა, უარყო X სოციალურ პლატფორმაზე გავრცელებული ჭორები, რომ აშშ-ის პრეზიდენტ დონალდ ტრამპსა და სომხეთის პრემიერ-მინისტრ ნიკოლ ფაშინიანს შორის სატელეფონო საუბარი შედგა. „Armenpress“-ის ცნობით, ნაზელი ბაღდასარიანმა ხაზგასმით აღნიშნა, რომ ზემოაღნიშნულ მტკიცებას უცხოური ინფორმაციული მანიპულირებისა და ჩარევის ტიპური ნიშნები აქვს. „X სოციალურ პლატფორმაზე ზოგიერთი მომხმარებლის ანგარიში ავრცელებს აშკარად ცრუ და მანიპულაციურ ინფორმაციას, რომ აშშ-ის პრეზიდენტმა დონალდ ტრამპმა, სავარაუდოდ, გამოაქვეყნა პოსტი Truth Social პლატფორმაზე, სადაც სომხეთის რესპუბლიკის პრემიერ-მინისტრ ნიკოლ ფაშინიანთან სატელეფონო საუბრის შესახებ იუწყებოდა.
მსურს გაცნობოთ, რომ ასეთი სატელეფონო საუბარი არ შემდგარა. სომხეთის რესპუბლიკის პრემიერ-მინისტრ ნიკოლ ფაშინიანსა და აშშ-ის პრეზიდენტ დონალდ ტრამპს შორის ასეთი შინაარსის განხილვა არ მომხდარა. გავრცელებული ინფორმაცია სიცრუეა და არ შეესაბამება რეალობას.
აღნიშნულ მტკიცებას აქვს უცხოური ინფორმაციული მანიპულირებისა და ჩარევის FIMI-ის ტიპური ნიშნები. კერძოდ, მისი გავრცელების მეთოდოლოგიის გათვალისწინებით – ერთი და იგივე შინაარსის გაძლიერებული გავრცელება ან ურთიერთდაკავშირებული ფორმულირებები X პლატფორმაზე მრავალი მომხმარებლის ანგარიშის მიერ, დაუდასტურებელ წყაროზე დაფუძნებული მტკიცების გავრცელება, ჩვენ ამას სისტემატური ინფორმაციული მანიპულირების მცდელობად მივიჩნევთ“, – წერს პრესმდივანი და მოუწოდებს მედიას, საზოგადოებრივ პირებს და სოციალური ქსელების მომხმარებლებს, თავი შეიკავონ დაუდასტურებელი ინფორმაციის გავრცელებისგან, განსაკუთრებით იმ შემთხვევებში, როდესაც საქმე ეხება სომხეთის რესპუბლიკის ეროვნულ უსაფრთხოებას.
