სომხეთს სამხრეთ კავკასიასთან ჩვენს ურთიერთობებში ქვაკუთხედის როლი აკისრია – ანტონიო კოსტა
ევროკავშირისთვის მნიშვნელოვანია სომეხი ხალხის თავისუფლების დაცვა, აირჩიონ საკუთარი ბედი და ამ საკითხში სომხეთს შეუძლია ბრიუსელის მხარდაჭერის იმედი ჰქონდეს.
„არმენპრეს“-ის ცნობით, ამის შესახებ ევროპის საბჭოს პრეზიდენტმა ანტონიო კოსტამ ერევანში სომხეთ-ევროკავშირის სამიტის ფარგლებში სომხეთის რესპუბლიკის პრემიერ-მინისტრ ნიკოლ ფაშინიანთან გაფართოებული შეხვედრის დროს განაცხადა. კოსტამ როგორც 4 მაისს ერევანში გამართულ ევროპის პოლიტიკური საზოგადოების მე-8 სამიტს, ასევე 5 მაისს დაგეგმილ სომხეთ-ევროკავშირის პირველ სამიტს ისტორიული მნიშვნელობის მოვლენები უწოდა.
„ეს არის ნათელი სიგნალი იმისა, თუ როგორ სურს ევროკავშირს სომხეთთან ურთიერთობების დამყარება. სომხეთი მშვიდობიანი, დემოკრატიული სისტემის კონსოლიდაციის ახალ პერიოდში შევიდა და ეს, რა თქმა უნდა, კარგ გარემოს ქმნის სომხეთ-ევროკავშირის ორმხრივი ურთიერთობების განვითარებისთვის“, – ხაზგასმით აღნიშნა ევროპის საბჭოს პრეზიდენტმა.
მისი თქმით, სომხეთსა და ევროკავშირს შორის 2025 წლის დეკემბრის დასაწყისში ხელმოწერილი სტრატეგიული დღის წესრიგის მიღების შემდეგ, ერევანსა და ბრიუსელს შორის კავშირები კიდევ უფრო გაძლიერდა. ევროპის საბჭოს პრეზიდენტმა აღნიშნა, რომ სომხეთი და ევროკავშირი ასევე მჭიდროდ თანამშრომლობენ უსაფრთხოებისა და თავდაცვის სექტორებში, ერთობლივ ძალისხმევას ახორციელებენ ჰიბრიდული საფრთხეების წინააღმდეგ ევროპული სამშვიდობო მექანიზმის ფარგლებში. ანტონიო კოსტამ ისაუბრა ევროკავშირის მიერ სომხეთში გაგზავნილ ახალ მისიაზე, რომლის შესახებაც გადაწყვეტილება ევროკავშირმა მიმდინარე წლის აპრილში მიიღო და რომლის მიზანია სომხეთის დემოკრატიული მდგრადობის გაძლიერება.
„ეს ხელშესახები დასტურია ჩვენი ერთობლივი ვალდებულებისა გამოწვევებთან გამკლავების მიმართ. ჩვენთვის მნიშვნელოვანია დავიცვათ სომეხი ხალხის თავისუფლება, აირჩიონ საკუთარი ბედი და შეგიძლიათ იმედი გქონდეთ, რომ ერთად გავივლით ამ გზას და შევაბიჯებთ ჩვენი საერთო ბედის ახალ ეტაპზე. სომხეთი მნიშვნელოვან როლს ასრულებს სამხრეთ კავკასიასთან ჩვენს ურთიერთობებში და აკავშირებს ევროპას კასპიის ზღვასთან და ცენტრალურ აზიასთან. ეს არის ჩვენი რეგიონების ისტორია და ეს ასევე ჩვენი რეგიონების მომავალია“, – ხაზგასმით აღნიშნა ანტონიო კოსტამ.
გამოსვლის დასასრულს მან ასევე ხაზი გაუსვა, რომ სომხეთ-ევროკავშირის პირველი სამიტის შედეგების საფუძველზე, მხარეები შეძლებენ სტრატეგიული პარტნიორობის, მშვიდობაში ერთობლივი ინვესტიციის განვითარებას სომხეთისა და ევროპის კეთილდღეობის მიზნით. 2026 წლის აპრილში ევროკავშირმა სომხეთში ახალი სამოქალაქო მისია (EUPM) დააარსა, რომლის მიზანია სომხეთ-ევროკავშირის სტრატეგიული პარტნიორობის გაღრმავება და უსაფრთხოების ხელშეწყობა. ამ დოკუმენტის თანახმად, მისიამ უნდა გააძლიეროს სომხეთის მდგრადობა ჰიბრიდული საფრთხეების მიმართ, სამინისტროებისა და უსაფრთხოების სააგენტოებისთვის სტრატეგიული, პრაქტიკული რჩევებისა და მხარდაჭერის მიწოდებით. ეს კონსულტაციები ფოკუსირებული იქნება პოლიტიკის შემუშავებაზე, გარე ინფორმაციის მანიპულირების, კიბერშეტევების, ასევე უკანონო ფინანსური ნაკადების გამოვლენასა და მათზე რეაგირებაზე. მისიამ ასევე უნდა შეაფასოს, თუ რა არის საჭირო სომხეთში უსაფრთხოების შესაძლებლობების განვითარებისთვის, რათა ქვეყანამ უფრო ეფექტურად შეძლოს ჰიბრიდული საფრთხეების აღმოჩენა და მათზე რეაგირება, ევროკავშირის მეთოდოლოგიებისა და სტანდარტების შესაბამისად.
