20 მაისს, სომხეთის ეკონომიკის მინისტრმა, გევორგ პაპოიანმა, გარნიში მონაწილეობა მიიღო საერთაშორისო ღვინის კონკურსის „კონკურს მონდიალ დე ბრიუსელ“-ის (Concours Mondial de Bruxelles“) ოფიციალური გახსნის ცერემონიაში.
19-23 მაისს, სომხეთმა რეგიონში პირველად უმასპინძლა მსოფლიოში ერთ-ერთ ყველაზე დიდ და პრესტიჟულ ღვინის დეგუსტაციის კონკურსს, „კონკურს მონდიალ დე ბრიუსელ“-ს, რომელშიც მონაწილეობის მისაღებად სომხეთში 65 ქვეყნიდან დაახლოებით 400 ღვინის ექსპერტი ჩამოვიდა: ჟურნალისტები, მყიდველები, სომელიეები, ენოლოგები და დარგის სხვა სპეციალისტები.
სტუმრებს მიესალმა გევორგ პაპოიანი, რომელმაც აღნიშნა, რომ უძველესი წარმოშობიდან დაწყებული, სომხური მეღვინეობის სექტორი დღეს ნამდვილ აღორძინებას განიცდის და ბოლო ათწლეულის განმავლობაში ეს ტრადიცია თანამედროვე და პერსპექტიულ სექტორად გადაიქცა, რომელიც მდგრადი განვითარების, ინოვაციების, მაღალი ხარისხისა და საერთაშორისო თანამშრომლობის პრინციპებზეა დაფუძნებული.
ეს უდიდესი მეღვინეობის ღონისძიება, რომელსაც 30 წელზე მეტი ისტორია აქვს, ჩატარდა პორტუგალიაში, იტალიაში, ესპანეთში, მექსიკასა და ჩინეთში.
წელს ის პირველად იმართება ჩვენს რეგიონში და წარმოადგენს სომხეთს, როგორც მეღვინეობის უძველეს აკვანს და ამავდროულად ინოვაციურ მეღვინეობის ქვეყანას.
ღონისძიების ფარგლებში სტუმრები ეწვევიან სომხეთის მთავარ მეღვინეობის რეგიონებს: ვაიოც ძორს, არმავირს, არაგაცოტნს და ტავუშს.
ვიზიტების დროს მათ ექნებათ შესაძლებლობა გაეცნონ სომხური მეღვინეობის მდიდარ ტრადიციებს, ადგილობრივ ვაზის ჯიშებსა და თანამედროვე მეღვინეობის კულტურას.
კონკურსის შემდეგ გაიმართება მედიატური, რომელშიც მონაწილეობას მიიღებს დაახლოებით 30 საერთაშორისო ჟურნალისტი.
დეგუსტაციის ბოლო დღეს, 23 მაისს, გამოცხადდება შემდეგი მასპინძელი ქვეყნის სახელი, რომელიც მანამდე საიდუმლოდ ინახება.
