შეერთებული შტატები კვლავ ღრმად არის ჩართული სომხეთისა და აზერბაიჯანის მხარდაჭერაში ყოვლისმომცველი სამშვიდობო შეთანხმების მისაღწევად. “არმენპრესის” ცნობით, ამის შესახებ 6 ოქტომბერს ვენაში განაცხადა ეუთოში აშშ-ის მუდმივმა წარმომადგენელმა მაიკლ კარპენტერმა.
სიტყვით გამოსვლისას მან შეახსენა, რომ აშშ-ის პრეზიდენტის მრჩეველი ეროვნული უსაფრთხოების საკითხებში ჯეიკ სალივანი 27 სექტემბერს ვაშინგტონში შეხვდა სომხეთის უშიშროების საბჭოს მდივანს არმენ გრიგორიანს და აზერბაიჯანის პრეზიდენტის მრჩეველ ჰიქმეტ ჰაჯიევს.
ამის შემდეგ, 4 ოქტომბერს, სახელმწიფო მდივანმა ენტონი ბლინკენმა სამმხრივი სატელეფონო საუბარი გამართა სომხეთისა და აზერბაიჯანის საგარეო საქმეთა მინისტრებთან, რომლის დროსაც მან ხელი შეუწყო ნდობის ატმოსფეროს ჩამოყალიბებას და მოლაპარაკებებში შემდგომ პროგრესს, ასევე მიესალმა სომხური და აზერბაიჯანული მხარეების მიერ გადადგმულ პოზიტიურ ნაბიჯებს, მათ შორის 17 სომეხი სამხედრო ტყვეს სომხეთში დაბრუნების ფაქტს. „ჩვენ ვაგრძელებთ სომხეთისა და აზერბაიჯანის წახალისებას მოლაპარაკების მაგიდასთან მნიშვნელოვანი საკითხების გადასაჭრელად. არ შეიძლება იყოს ხანგრძლივი მშვიდობა შერიგების გარეშე და დიპლომატია ერთადერთი გზაა იქამდე. შემზარავი ვიდეო, რომელიც გასულ კვირას გავრცელდა სოციალურ მედიაში, სადაც ნაჩვენებია, თუ როგორ კლავენ აზერბაიჯანის შეიარაღებული ძალები უიარაღო სომეხ ტყვეებს, სრული და მიუკერძოებელი გამოძიების საგანი უნდა გახდეს. პატიმრების წამებაში პასუხისმგებელი პირები უნდა დაისაჯონ.
ჩვენ ვითვალისწინებთ აზერბაიჯანის გენერალური პროკურორის მიერ დაწყებულ გამოძიებას და ვახსენებთ მხარეებს, რომ დაიცვან თავიანთი ვალდებულებები, სასწრაფოდ დააბრუნონ სამხედრო ტყვეები და მოექცნენ მათ საერთაშორისო ვალდებულებების შესაბამისად“, – განაცხადა კარპენტერმა.
მან აღნიშნა, რომ აშშ ძალიან შემაშფოთებლად მიიჩნევს სექტემბერში დაფიქსირებულ ცეცხლის შეწყვეტის ხელშეკრულების დარღვევას. „აშშ მოუწოდებს სომხეთსა და აზერბაიჯანს, მკაცრად დაიცვან მდგრადი ცეცხლის შეწყვეტა, გაიყვანონ და გაათავისუფლონ შეიარაღებული ძალები, ასევე გააგრძელონ მოლაპარაკებები საზღვრის დელიმიტაციაზე მშვიდობიანი მოგვარების მხარდასაჭერად. ჩვენ ვიმეორებთ ჩვენს მოწოდებას აზერბაიჯანისადმი, 12 სექტემბრის ღამით გაიყვანოს თავისი შეიარაღებული ძალები საწყის პოზიციებზე საომარი მოქმედებების დაწყებამდე. სასაზღვრო დავები მოლაპარაკებებით უნდა გადაწყდეს და არა ძალადობით. სომეხი ჯარისკაცების და აზერბაიჯანის მოქალაქეების დაღუპვა, რომლებიც გასულ კვირას ნაღმზე მოხვდნენ, ნათლად და ტრაგიკულად მეტყველებს ამ კონფლიქტის მიმდინარე ჰუმანიტარულ შედეგებზე“, – განაცხადა აშშ-ს მუდმივმა წარმომადგენელმა. მან ხაზგასმით აღნიშნა, რომ შეერთებული შტატები სრულად უჭერს მხარს ეუთო-ს როლის გაზრდას ნდობის ატმოსფეროსა და კონფლიქტების პრევენციის ინსტრუმენტების შექმნაში, მათ შორის ფაქტების დამდგენი მისიის შექმნას, რაც სომხეთმა მოითხოვა.
„მოვუწოდებთ სომხეთსა და აზერბაიჯანს გადადგან გადაუდებელი ნაბიჯები დაძაბულობის შესამსუბუქებლად, ნდობის ატმოსფეროს შესაქმნელად და საერთაშორისო ვალდებულებების შესრულებისადმი პასუხისმგებლობით მიდგომის გამოვლენის მიზნით. ჩვენ მოვუწოდებთ შემდგომი პროგრესისკენ უგზო-უკვლოდ დაკარგულთა საკითხის მოგვარებასა და დარჩენილი სამხედრო ტყვეების დაბრუნებაში. შეერთებული შტატები მხარს უჭერს ყოვლისმომცველ სამშვიდობო პროცესს და მოწოდებულია იმუშაოს თანამოაზრე ორმხრივ პარტნიორებთან, როგორც ევროკავშირთან, ასევე საერთაშორისო ორგანიზაციებთან, როგორიცაა ეუთო“, – განაცხადა კარპენტერმა.
