სომხეთსა და აზერბაიჯანს შორის ურთიერთობების მოწესრიგებას საერთაშორისო გარანტიები დასჭირდება. ამის შესახებ სომხეთის საგარეო საქმეთა მინისტრმა არარატ მირზოიანმა ეროვნულ ასამბლეაში დეპუტატების შეკითხვებს უპასუხა. მისი თქმით, მთელ ამ მოწესრიგებას დასჭირდება საერთაშორისო გარანტიები, დავების გადაწყვეტის კონკრეტული მექანიზმები.
„ვფიქრობ, რომ ადგილზე საჭირო იქნება საერთაშორისო თანამეგობრობის წარმომადგენლების, კერძოდ, გაეროს ოფისის ყოფნა. აზერბაიჯანის რიტორიკა და აგრესიული პოლიტიკა ნათლად აჩვენებს, რომ მთიან ყარაბაღშიც კი არის სამშვიდობო ძალების საჭიროება“, – განაცხადა საგარეო საქმეთა მინისტრმა. მისი თქმით, საერთაშორისო თანამეგობრობისთვის არის აქტივობების ფართო სპექტრი. უფრო მეტიც, ეს ეხება როგორც მოგვარების პროცესს, ასევე მომავალსაც.
