სომხეთის რესპუბლიკის საგარეო საქმეთა მინისტრის მოადგილის, პარუირ ჰოვჰანნისიანის დაკვირვებით, 2024 წლის განმავლობაში, როგორც სომხეთ-ევროკავშირის, ისე სომხეთ-ამერიკის შეერთებული შტატების ურთიერთობამ ღრმა ცვლილებები და პოზიტიური განვითარება განიცადა, რამაც ისინი უფრო სტრატეგიულ დონეზე აიყვანა.
„არმენპრესის“ ცნობით, ამის შესახებ ორპანელიან დისკუსიაზე „გამოწვევები და შესაძლებლობები 2025 წლამდე“, სომხეთ-ევროკავშირისა და სომხეთ-აშშ-ის ურთიერთობებზე საუბრისას განაცხადა სომხეთის საგარეო საქმეთა მინისტრის მოადგილემ პარუირ ჰოვჰანნისიანმა.
„საუბარია ღრმა ხარისხობრივ ცვლილებებზე ევროკავშირთან და შეერთებულ შტატებთან ურთიერთობაში. 1 წელზე ცოტა მეტი გავიდა, რაც ევროკავშირთან გვაქვს ეს ცვლილება. ამის შესახებ გრანადაში პრემიერ-მინისტრ ფაშინიანისა და ევროკომისიის პრეზიდენტის ურსულა ფონ დერ ლაიენის ერთობლივი განცხადების დროს გამოცხადდა, სადაც ასახული იყო ის მიმართულებები, რომლითაც ევროკავშირმა და სომხეთმა უნდა იხელმძღვანელონ: ეს ტექსტი არ იყო რუტინული ტექსტი, ის შეიცავს მთელ რიგ სფეროებს, რომლებიც არასდროს ყოფილა ჩვენს დღის წესრიგში. ჩვენ ვსაუბრობთ უსაფრთხოებაზე, ჩვენს გამძლეობაზე, დივერსიფიკაციაზე, თუ ჩვენს ახალ ამბიციებზე“, – განაცხადა საგარეო საქმეთა მინისტრის მოადგილემ სიტყვით გამოსვლისას.
ევროკავშირთან ურთიერთობაზე საუბრისას, მინისტრის მოადგილემ შეახსენა, რომ ევროკავშირმა სომხეთში ფაქტების დამდგენი მისია გაგზავნა, რის შედეგადაც ისინი ახალი პარტნიორობის დღის წესრიგის ფორმირებას ცდილობენ. მისი თქმით, მოლაპარაკებები დაახლოებით კვირაში დასრულდება.
„ეს დღის წესრიგი არა მხოლოდ შეავსებს „ყოვლისმომცველი და გაფართოებული პარტნიორობის“ შეთანხმებას, არამედ გააფართოვებს მას ახალი სფეროების ჩართვით, რომლებიც არც კი იყო ასოცირების შეთანხმების პროექტში“, – აღნიშნა მინისტრის მოადგილემ.
რაც შეეხება ევროკავშირის ვიზების ლიბერალიზაციის პროცესს სრ მოქალაქეებისთვის, მინისტრის მოადგილემ განაცხადა, რომ სომხეთი წლების განმავლობაში მუშაობდა ამ მიმართულებით და ახლა ამ საკითხზე არსებითი მოლაპარაკებები დაწყებულია.
„იმედი გვაქვს, რომ ეს პროცესი დიდხანს არ გაგრძელდება. პარალელურად ჩვენ შევუერთდით ევროპის მშვიდობის ფონდს, რაც დიდი წვლილი იქნება თავდაცვის სფეროში ჩვენს მიერ განხორციელებულ რეფორმებში“, – დასძინა მინისტრის მოადგილემ.
პარუირ ჰოვჰანნისიანმა აღნიშნა, რომ 2024 წელი ასევე უპრეცედენტო პერიოდი იყო ევროკავშირისა და შეერთებული შტატების მიერ სომხეთისთვის გაწეული პოლიტიკური მხარდაჭერის თვალსაზრისით.
„აშშ-ევროკავშირი-სომხეთის სამიტი 5 აპრილს გაიმართა. ჩვენ არასდროს გვქონია ასეთი ფორმატი და სამიტმა ძალიან ცალსახად დაუჭირა მხარი სომხეთის ტერიტორიულ მთლიანობას, დამოუკიდებლობას, ყველა დემოკრატიულ პროცესს და ჩვენს ძალისხმევას რეგიონში მშვიდობის დამყარებისთვის. იყო არაერთი მნიშვნელოვანი შეთანხმება ჰუმანიტარულ დახმარებასთან დაკავშირებით და ეს მხოლოდ 1 წელიწადში“, – ხაზგასმით აღნიშნა პარუირ ჰოვჰანნისიანმა.
მისი დაკვირვებით, 2024 წელი განსაკუთრებული იყო სომხეთისა და აშშ-ის ურთიერთობის თვალსაზრისითაც.
„წელს ჩვენ გვქონდა აშშ-სომხეთის სტრატეგიული დიალოგის ძალიან მნიშვნელოვანი სესია და ამავდროულად გვქონდა არაერთი მნიშვნელოვანი დელეგაციის ვიზიტი სომხეთში“, – განაცხადა ჰოვჰანნისიანმა.
ამ უკანასკნელის თქმით, აშშ-სთან ურთიერთობაში არაერთი მნიშვნელოვანი დარგობრივი მოვლენა მოხდა, რომლებიც მიმართულია სომხეთის მიერ სხვადასხვა მიმართულებით განხორციელებული დივერსიფიკაციის პოლიტიკის გაძლიერებაზე.
