ფაშინიანმა სომხურ სასოფლო-სამეურნეო პროდუქტებზე რუსეთის მიერ დაწესებული შეზღუდვები არასწორ ნაბიჯად მიიჩნია
სომხურ სასოფლო-სამეურნეო პროდუქტებზე შეზღუდვების დაწესება არასწორი ნაბიჯია, რადგან ის ხალხს ევრაზიული ეკონომიკური კავშირის წინააღმდეგ აყენებს. ამის შესახებ განაცხადა სომხეთის პრემიერ-მინისტრმა ნიკოლ ფაშინიანმა „იზვესტიას“ ჟურნალისტის კითხვის საპასუხოდ, სომხური სასოფლო-სამეურნეო პროდუქტების ექსპორტზე დაწესებულ შეზღუდვებზე საუბრისას.
„ვფიქრობ, ეს არასწორი ნაბიჯებია, რადგან ისინი ხალხს ევრაზიული ეკონომიკური კავშირის წინააღმდეგ აყენებს. და მე, როგორც ევრაზიულ ეკონომიკურ კავშირში მაღალი თანამდებობის პირი, ამას პრობლემად მივიჩნევ. მაგრამ ჩვენ ყველა პრობლემას მოვაგვარებთ“, – თქვა პრემიერ-მინისტრმა.
ჟურნალისტის კითხვაზე, აღიარებს თუ არა სომხეთი სასოფლო-სამეურნეო პროდუქტებთან დაკავშირებული პრობლემების არსებობას, კერძოდ, ფიტოსანიტარიული კონტროლის სფეროში, ფაშინიანმა უპასუხა, რომ ასეთი პრობლემები შეიძლება წარმოიშვას ცალკეული კომპანიების შემთხვევაში.
„ცალკეულ კომპანიებს პრობლემები აქვთ და ეს ყველგან ასეა, მათ შორის რუსეთში. მაგრამ, ზოგადად, ჩვენ გვაქვს ძალიან კარგი კონტროლის სისტემა და ჩვენ ვაგრძელებთ ჩვენი სასოფლო-სამეურნეო პროდუქტების ხარისხის გაუმჯობესებას“, – აღნიშნა მან. „როსსელხოზნადზორმა“ განაცხადა, რომ 2026 წლის 2 ივნისიდან სომხეთიდან ალუბლის, გარგარის, ქლიავის, ატმის, ნექტარინისა და ყურძნის იმპორტზე დროებით შეზღუდვებს აწესებს, ფიტოსანიტარიული მოთხოვნების დარღვევის მოტივით. მანამდე, რუსეთის სააგენტომ ასევე შეზღუდა სომხეთიდან რიგი ბოსტნეულის იმპორტი.
