საზოგადოება

როდის აღდგება რუსეთ-საქართველოს შორის ავიამიმოსვლა: რუსეთში განმარტება კეთდება

,,სპუტნიკი საქართველო” წერს, რომ რუსეთსა და საქართველოს შორის ავიამიმოსვლა შესაძლოა სანიტარულ-ეპიდემიოლოგიური ვითარების დასტაბილურების შემდეგ მოხდეს, იუწყება РИА Новости რუსეთის საგარეო საქმეთა მინისტრის მოადგილე ანდრეი რუდენკოზე დაყრდნობით.

მისი თქმით, ორი წლის წინ რუსეთიდან საქართველოში საჰაერო გადაზიდვების აკრძალვა იძულებითი ზომა იყო და დროებითი ხასიათისაა.

„2019 წლის ივლისში რუსული ავიაკომპანიებისთვის დაწესებული აკრძალვა რუსეთის ფედერაციიდან საქართველოს ტერიტორიაზე საჰაერო გადაზიდვების განხორციელებაზე, იყო ცნობილი ანტირუსული პროვოკაციებით გამოწვეული იძულებითი ზომა. დარწმუნებული ვართ, რომ ეს ზომები დროებითია. იმედი გვაქვს, რომ საქართველოს ხელისუფლებამ გაკვეთილი გამოიტანა მომხდარიდან, და კორონავირუსის გავრცელებასთან დაკავშირებული სანიტარულ-ეპიდემიოლოგიური ვითარების დასტაბილურების შემდეგ გაჩნდება იმის შესაძლებლობა, რომ ავიამიმოსვლის აღდგენის საკითხს დავუბრუნდეთ“, − განაცხადა რუდენკომ.

აღსანიშნავია, რომ რუსულ ავიაკომპანიებს საქართველოში ფრენები 2019 წლის ივლისში აეკრძალათ სახელმწიფო დუმის დეპუტატ სერგეი გავრილოვთან დაკავშირებული საპროტესტო აქციებისა და ანტირუსული ლოზუნგების გამო. ამ დროისათვის რუსეთის მოქალაქეებს საქართველოში შემოსვლა მესამე ქვეყნების გავლით შეუძლიათ იმ შემთხვევაში, თუ ვაქცინაციის შესახებ სერტიფიკატი ან PCR-ტესტზე უარყოფითი პასუხი ექნებათ.

ნახეთ მეტი
Back to top button