აზერბაიჯანის ქმედებების გამო მთიან ყარაბაღსა და ლაჩინის დერეფანში ვითარება კვლავ დაძაბულია, რეგიონში ჰუმანიტარული მდგომარეობა გაუარესდა, – ამის შესახებ მოსკოვში რუსეთის პრეზიდენტ ვლადიმირ პუტინთან დღევანდელ შეხვედრაზე განაცხადა სომხეთის პრემიერ-მინისტრმა ნიკოლ ფაშინიანმა.
„რეგიონული გაგებით, რა თქმა უნდა, საკმაოდ დაძაბული სიტუაცია გვაქვს მთიან ყარაბაღში და ლაჩინის დერეფანში. 2020 წლის 9 ნოემბრის სამმხრივი განცხადების საპირისპიროდ, აზერბაიჯანმა უკანონოდ გადაკეტა ლაჩინის დერეფანი, რის გამოც მთიანი ყარაბაღი ჰუმანიტარულ კრიზისში იყო. ბუნებრივი აირისა და ელექტროენერგიის მიწოდება მთიან ყარაბაღში დაბლოკილია, რაც ამძიმებს ჰუმანიტარულ მდგომარეობას მთიან ყარაბაღში“, – განაცხადა მან.
როგორც პრემიერ-მინისტრმა დასძინა, „მთიანი ყარაბაღისთვის საკვებისა და საქონლის მიწოდება რთულია“, პრობლემის მოგვარებაში რუსი სამშვიდობოები ეხმარებიან.
სამწუხაროდ, ლაჩინის დერეფნის ბლოკირება რუსი სამშვიდობოების თანდასწრებით მოხდა.
ფაშინიანმა აღნიშნა, რომ სომხეთის სასაზღვრო და საბაჟო სამსახურები მზად არიან უზრუნველყონ ყველა სატრანსპორტო საშუალების ნორმალური გავლა ქვეყნის ტერიტორიაზე.
„სომხეთის სასაზღვრო და საბაჟო სამსახურები მზად არიან უზრუნველყონ ყველა სატრანსპორტო საშუალებისა და მატარებლის ნორმალური მოძრაობა, განსაკუთრებით სომხეთის ტერიტორიის გავლით“, – განაცხადა მან.
