სომხეთი შეიძლება გახდეს გაზის მიწოდების სატრანზიტო წერტილი – თურქი პარლამენტარი
სომხეთსა და თურქეთს სხვადასხვა სფეროში ურთიერთშემავსებელი შესაძლებლობები აქვთ და ამ პოტენციალის გამოყენებამ შეიძლება ხელი შეუწყოს ორივე ქვეყნის და მთელი რეგიონის განვითარებას.
„არმენპრეს“-ის ცნობით, ამის შესახებ ნატოს საპარლამენტო ასამბლეის ქვეკომიტეტის თავმჯდომარემ, თურქეთის პარლამენტის წევრმა, ფატმა აქსალმა, ერევანში ნატოს საპარლამენტო ასამბლეის 108-ე როუზ-როტის სემინარის ფარგლებში გამართულ ბრიფინგზე განაცხადა. „სომხეთს ზოგიერთ სფეროში უპირატესობები აქვს, თურქეთს კი – ზოგში. ვაჭრობით ყველა სარგებლობს.
ჩვენ მეზობლები ვართ და ისტორიული კავშირები გვაქვს. სომხეთის მოქალაქეები თურქეთში ცხოვრობენ და მათთან კარგი ურთიერთობა გვაქვს. მე მჯერა, რომ ორივე ქვეყანა, მთელი სამხრეთ კავკასიის რეგიონი მხოლოდ მშვიდობით ისარგებლებს“, – თქვა აქსალმა. მან ასევე ხაზი გაუსვა თურქეთის როლს, როგორც აღმოსავლეთსა და დასავლეთს შორის გზაჯვარედინის.
„თურქეთი სომხეთს მთელ ევროპასთან დააკავშირებს. სომხეთს ევროკავშირში გაწევრიანება სურს. ჩვენ არ ვართ ევროკავშირის წევრი, მაგრამ სომხეთსა და ევროპას შორის გზაჯვარედინი ვართ და ეს ძალიან დაგვეხმარება. გარდა ამისა, სომხეთი შეიძლება გახდეს სატრანზიტო პუნქტი ენერგეტიკის სექტორში, მაგალითად, გაზის მიწოდებისთვის“, – აღნიშნა მან. აქსალი დარწმუნებულია, რომ სომხეთსა და თურქეთს შორის ურთიერთობების ნორმალიზება არა მხოლოდ რეგიონულ მშვიდობას, არამედ ეკონომიკური თანამშრომლობის ახალი შესაძლებლობების გახსნასაც გამოიწვევს.
