სომეხმა სპეციალისტებმა პირველად შექმნეს სარბოლო ავტომობილი
სომხეთის კულტურის, განთლებისა და სპორტის მინისტრმა ჟანა ანდრეასიანმა მიიღო დელეგაცია, რომელსაც ხელმძღვანელობდა საერთაშორისო საავტომობილო ფედერაციის (FIA) გენერალური მდივანი ვალერიო ლაჩისი. შეხვედრას ასევე ესწრებოდა კულტურის, განთლებისა და სპორტის მინისტრის მოადგილე ჰასმიკ ავაგიანი.
მინისტრმა ჟანა ანდრეასიანმა ვიზიტს მნიშვნელობა მიანიჭა და აღნიშნა, რომ სომხეთში ავტოსპორტის განვითარებას შეიძლება ჰქონდეს არა მხოლოდ სპორტული, არამედ საგანმანათლებლო და ტექნოლოგიური მნიშვნელობაც. მისი თქმით, სექტორი შეიძლება ჩაითვალოს საინჟინრო განათლების ხელშეწყობის ეფექტურ მექანიზმად, განსაკუთრებით აკადემიური ქალაქის ტექნოლოგიური კლასტერის ფარგლებში.
შეხვედრაზე წარმოდგენილი იყო FIA-ს მიერ განხორციელებული „ხელმისაწვდომი სარბოლო ავტომობილის“ პროექტი, რომლის ფარგლებშიც სომხეთის საავტომობილო ფედერაციის სპეციალისტებმა პირველად შექმნეს სარბოლო ავტომობილი, პროცესი კი მთლიანად სომხეთში დანერგეს. მინისტრმა ხაზგასმით აღნიშნა, რომ ინიციატივა ახალგაზრდების პოტენციალის გამოვლენის, სტუდენტების ჩართულობის გაზრდის და გამოყენებითი ცოდნის განვითარების ხელშეწყობის შესაძლებლობას მისცემს.
FIA-ს წარმომადგენელმა მადლიერება გამოხატა მიღებისა და თანამშრომლობის სურვილისთვის და აღნიშნა, რომ ბოლო წლებში სომხეთმა ჩამოაყალიბა პროფესიული პოტენციალი მოტოსპორტის სფეროში, დაფიქსირდა ზრდა და პროგრესი ორგანიზაციული შესაძლებლობების მხრივ. „ხელმისაწვდომი კროსკარის“ პროექტის წარდგენისას აღინიშნა, რომ FIA-მ შეიმუშავა დიზაინის გადაწყვეტილებები, რაც ადგილზე წარმოების ორგანიზების შესაძლებლობას იძლევა.
პროექტის მიზანია ისეთი გარემოს შექმნა, სადაც მოტოსპორტში შესვლა შესაძლებელი იქნება დიდი ფინანსური ინვესტიციების გარეშე, ადგილობრივი წარმოებითა და მინიმალური რესურსებით.
სომხეთი გახდა ბოლო ქვეყანა, რომელიც FIA-ს პროექტს შეუერთდა. საერთაშორისო ფედერაციის კონსულტანტი სომხეთში დაახლოებით 10 დღის განმავლობაში მუშაობდა და სომხეთში ჩამოყალიბებული გუნდის მაღალ პროფესიულ შესაძლებლობებს აფასებდა. სულ რაღაც რამდენიმე თვეში ადგილობრივმა სპეციალისტებმა შექმნეს ადგილობრივი წარმოება და ჩამოაყალიბეს პატარა, მაგრამ სრულყოფილი ეკოსისტემა, რომელმაც საერთაშორისო ექსპერტებისგან დადებითი შეფასება მიიღო.
შეხვედრაზე ასევე ისაუბრეს FIA-ს სტიპენდიის პროგრამაზე, რომელიც ხორციელდება გაერთიანებულ სამეფოში, კრენფილდის უნივერსიტეტში, მოტოსპორტის მექატრონიკის სპეციალობის სტუდენტებისთვის.
კულტურის, განთლებისა და სპორტის მინისტრმა ჟანა ანდრეასიანმა შესთავაზა განიხილონ სომხეთის ეროვნულ პოლიტექნიკურ უნივერსიტეტთან თანამშრომლობის, სტუდენტების ჩართულობის, გაცვლითი პროგრამებისა და ერთობლივი სამეცნიერო-საგანმანათლებლო პროექტების განხორციელების შესაძლებლობები.
შეხვედრის შეჯამებისას, მინისტრმა ჟანა ანდრეასიანმა კიდევ ერთხელ დაადასტურა სომხეთის მთავრობის მზადყოფნა გააღრმავოს თანამშრომლობა და ერთობლივი ძალისხმევით განავითაროს საავტომობილო სპორტი სომხეთში, როგორც საგანმანათლებლო, ტექნოლოგიური და ახალგაზრდული პოტენციალის განვითარების მნიშვნელოვანი მიმართულება.
