სომხეთი საჰაერო თავდაცვის საკითხში მხოლოდ საკუთარი თავის იმედზე უნდა იყოს.
Armenpress-ის ცნობით, ამის შესახებ ეროვნულ კრებაში ჟურნალისტებთან ბრიფინგზე განაცხადა სომხეთის რესპუბლიკის შეიარაღებული ძალების გენერალური შტაბის უფროსმა, გენერალ-ლეიტენანტმა ედუარდ ასრიანმა, უპასუხა რა იმ კითხვაზე, გათვალისწინებულია თუ არა არმიის ტრანსფორმაციის კონცეფციის მიხედვით სომხეთის საჰაერო თავდაცვის სისტემის გამოყოფა რუსული საჰაერო თავდაცვის სისტემიდან.
„სომხეთის რესპუბლიკის ჰაერსაწინააღმდეგო, რაკეტსაწინააღმდეგო და დრონების საწინააღმდეგო სისტემების საკითხში მხოლოდ საკუთარი თავის იმედზე უნდა ვიყოთ. არ უნდა ვიყოთ სხვაზე დამოკიდებული. იმდენად ძლიერები უნდა გავხდეთ, რომ დამოუკიდებლად შევძლოთ სომხეთის ტერიტორიაზე ჩვენს წინაშე დასახული ამოცანების შესრულება“, – აღნიშნა გენერალური შტაბის უფროსმა. მან ასევე განაცხადა, რომ სომხეთის რესპუბლიკის საჰაერო თავდაცვა ახლა უკეთეს მდგომარეობაშია, ვიდრე ის ქვეყანაში 2018 წელს მომხდარ ხავერდოვან რევოლუციამდე იყო.
შეგახსენებთ, რომ 2015 წლის 23 იანვარს მოსკოვში ხელი მოეწერა შეთანხმებას სომხეთსა და რუსეთს შორის კოლექტიური უსაფრთხოების კავკასიის რეგიონში ერთობლივი საჰაერო თავდაცვის სისტემის შექმნის შესახებ. შეთანხმებას ხელი მოაწერეს სომხეთის მაშინდელმა თავდაცვის მინისტრმა სეირან ოჰანიანმა და რუსეთის თავდაცვის მინისტრმა სერგეი შოიგუმ. ერთობლივი საჰაერო თავდაცვის სისტემის შექმნის მთავარი მიზანი იყო ორი ქვეყნის საჰაერო თავდაცვის ძალებისა და საშუალებების ერთობლივი გამოყენება და ინტეგრაცია კავკასიის რეგიონში.
