84 წლის ასაკში გარდაიცვალა ქართველი და საბჭოთა სცენარისტი, დრამატურგი, თეატრისა და კინორეჟისორი, მხატვარი და მოქანდაკე რეზო გაბრიაძე. ამის შესახებ იტყობინება “Sputnik საქართველო” ქვეყნის კულტურის სამინისტროს გზავნილზე მითითებით. გარდაცვალების მიზეზი არ დაზუსტებულა.
”რეზო გაბრიაძის გარდაცვალება აუნაზღაურებელი დანაკარგია ქართული კულტურისთვის”, – ნათქვამია სამინისტროს განცხადებაში.
რეზო გაბრიაძე დაიბადა 1936 წელს ქალაქ ქუთაისში. მას აქვს დაწერილი სცენარები 35-ზე მეტ ფილმზე, მათ შორის “არ დაიდარდო!”, “მიმინო”, “შერეკილები”, “კინ-ძა-ძა!”, “არაჩვეულებრივი გამოფენა”, “პასპორტი”. 1981 წელს გაბრიაძემ დააარსა თბილისის მარიონეტების თეატრი.
გაბრიაძე ჩიჟიკ-პიჟიკის ძეგლის ერთ-ერთი ავტორია, რომელიც 1994 წლის ნოემბერში დამონტაჟდა პეტერბურგში, პირველ საინჟინრო ხიდთან, ფონტანკაზე. მოქანდაკემ ასევე შექმნა ძეგლი “მაიორ კოვალევის ცხვირი” ნიკოლაი გოგოლის მოთხრობის “ცხვირის” გმირის საპატივცემულოდ, იგი დამონტაჟდა რიმსკი-კორსაკოვის გამზირზე მდებარე სახლის ფასადზე. 1995 წელს ოდესაში გაიხსნა გაბრიაძის სკულპტურული კომპოზიცია “ოდესის ანეკდოტების გმირის რაბონოვიჩის ძეგლი”.
გაბრიაძე არის სსრკ-ის სახელმწიფო პრემიის (1989), რუსთაველის პრემიის, „ნიკას“, „ტრიუმფის“, „ოქროს ნიღბის“ პრემიების ლაურეატი. ასევე ის არის საფრანგეთის რესპუბლიკის ხელოვნებისა და ლიტერატურის ორდენის კავალერი.
