სომხეთში ევროკავშირის ახალი მისიის დამტკიცების საკითხს მიეძღვნა ექსპერტების მრგვალი მაგიდა (ვიდეო)
სომხეთის საგარეო საქმეთა სამინისტრომ, სომხეთში ევროკავშირის ახალ პარტნიორობის მისიასთან ერთად, 13 ივლისს მრგვალი მაგიდის დისკუსია გამართა, რომელსაც მასპინძლობდნენ სომხეთის რესპუბლიკის საგარეო საქმეთა მინისტრის მოადგილე ვაჰან კოსტანიანი და ევროკავშირის საგარეო მოქმედების სამსახურის სამოქალაქო ოპერაციების მეთაური და მმართველი დირექტორი სტეფანო ტომატი, ევროკავშირის დელეგაციის ხელმძღვანელ ვასილის მარაგოსთან და სომხეთში ევროკავშირის პარტნიორობის მისიის ხელმძღვანელ კოსმინ დინესკუსთან ერთად.
„არმენპრეს“-ის ცნობით, განცხადება გაავრცელა სომხეთის რესპუბლიკის საგარეო საქმეთა სამინისტრომ. ერთობლივი ღონისძიება დაემთხვა ევროკავშირის საბჭოს მიერ სომხეთში ევროკავშირის პარტნიორობის მისიის გაშვების შესახებ გადაწყვეტილების მიღებას. სომხეთში ევროკავშირის პარტნიორობის მისიის გაშვება სომხეთსა და ევროკავშირს შორის პარტნიორობაში ახალ და მნიშვნელოვან გვერდს ხსნის. ამ მისიის მეშვეობით, ევროკავშირი კიდევ ერთხელ ადასტურებს თავის ერთგულებას, მხარი დაუჭიროს სომხეთის მდგრადობას და ინსტიტუციურ შესაძლებლობებს მუდმივად ცვალებადი გამოწვევების წინაშე. სტრატეგიული კონსულტაციების, ტექნიკური ექსპერტიზისა და ინსტიტუციური შესაძლებლობების გაძლიერების გზით, მისია მჭიდროდ ითანამშრომლებს სომხეთის ინსტიტუტებთან პოლიტიკური ჩარჩოების გასაძლიერებლად, მანდატის ფარგლებში მთავრობის შესაძლებლობების გასაუმჯობესებლად და სააგენტოთაშორისი კოორდინაციის მხარდასაჭერად. ღონისძიებას ესწრებოდნენ სამოქალაქო საზოგადოების, აკადემიური წრეების წარმომადგენლები და ექსპერტები, რომლებსაც გააცნეს სომხეთში ევროკავშირის პარტნიორობის მისია, როგორც სომხეთის მდგრადობის მხარდამჭერი პარტნიორი. ასევე, გაიმართა მოსაზრებების გაცვლა სომხეთის მდგრადობის გაძლიერებაზე ახალი საფრთხეების, კერძოდ, კიბერ საფრთხეების, უცხოური ინფორმაციის მანიპულირებისა და ჩარევის, ასევე უკანონო ფინანსური ნაკადების მიმართ.
