სომხური მხარე ახლა მზად არის განაახლოს შეხვედრები აზერბაიჯანთან. ამის შესახებ დღეს, 12 აპრილს, სომხეთის საგარეო საქმეთა მინისტრმა არარატ მირზოიანმა ეროვნულ ასამბლეაში განაცხადა, შეეხო რა საკითხს, როცა აზერბაიჯანის საგარეო საქმეთა მინისტრმა ჯეიჰუნ ბაირამოვმა სომხეთი დესტრუქციულობაში დაადანაშაულა.
„ჩვენ გადავდეთ ჩვენი ბოლო დაგეგმილი შეხვედრა, რომელიც მოსკოვში გასული წლის ბოლოს უნდა გამართულიყო. ეს შეფერხება გამოწვეული იყო ლაჩინის დერეფნის უკანონო ბლოკირების შედეგად შექმნილი სიტუაციით. ჩვენ მზად ვართ ახლავე განვაახლოთ შეხვედრები“, – განაცხადა მირზოიანმა.
მან ხაზგასმით აღნიშნა, რომ შეხვედრის გადადების შემთხვევაშიც კი მოლაპარაკების პროცესი არასოდეს შეწყვეტილა.
„ამ შეხვედრის გადადების შემდეგ ჩვენ უკვე რამდენჯერმე გავცვალეთ წინადადებები სამშვიდობო ხელშეკრულების შესახებ: ჩვენ გვაქვს ჩვენი და მათ აქვთ თავიანთი სარედაქციო წინადადებები. ჩვენ გვქონდა პირდაპირი ან შუამავლობითი დისკუსია, მათ შორის იმ დოკუმენტთან დაკავშირებით, ახლა უკვე გაკეთდა წინადადებები სხვადასხვა პარტნიორების მხრიდან მშვიდობისა და სტაბილურობისთვის რეგიონში, რომ ჩვენი შეხვედრები კვლავ გაგრძელდეს. ახლა მივიღეთ წინადადება შეხვედრების განახლების შესახებ“.
