აზერბაიჯანის მიერ მთიანი ყარაბაღის ბლოკადას გენოციდის ნიშნები აქვს – ბობ მენენდესი
აშშ-ის სენატის საგარეო ურთიერთობათა კომიტეტის თავმჯდომარემ ბობ მენენდესმა სენატის სესიაზე გააფრთხილა, რომ აზერბაიჯანის მიერ მთიანი ყარაბაღის ბლოკადას გენოციდის ყველა ნიშანი აქვს.
„Armenpress“-ის ცნობით, სენატორი ალიევის რეჟიმის წინააღმდეგ სანქციების დაწესებას მოითხოვდა ომის დანაშაულებისა და ეთნიკური წმენდისთვის.
მენენდესმა წარმოადგინა მთიან ყარაბაღში შიმშილის პირველი მსხვერპლის ფოტოები და ხაზგასმით აღნიშნა, რომ აზერბაიჯანის რეჟიმი ახორციელებს გენოციდს მთიანი ყარაბაღის სომხების წინააღმდეგ.
„აზერბაიჯანში ალიევის მთავრობა ახორციელებს საშინელი ძალადობის კამპანიას, რომელსაც აქვს გენოციდის ყველა ნიშანი მთიანი ყარაბაღელი სომხების წინააღმდეგ. მათ მიზანმიმართულად და ბოროტმოქმედებით ბლოკადაში მოაქციეს 120 ათასამდე ქრისტიანი სომეხი ყარაბაღის მთებში… ალიევი და მისი რეჟიმი ცდილობს ამ ხალხის შიმშილით მოკვლას, აიძულებს მათ მოკვდნენ ან პოლიტიკურად დაემორჩილნონ“, – თქვა მენენდესმა და შეახსენა, რომ ერთადერთი გზა, რომელიც მთიან ყარაბაღს სომხეთთან აკავშირებს, გასული წლის დეკემბრიდან დაიკეტა.
სენატორმა ზედმიწევნით წარმოადგინა მთიან ყარაბაღში ბოლო 9 თვის განმავლობაში შექმნილი მძიმე ჰუმანიტარული მდგომარეობა, რის გამოც გახშირდა არასრულფასოვანი კვების შედეგად გარდაცვალების შემთხვევები.
„ამ მომენტში აშშ მარცხდება. აშშ არ აკმაყოფილებს ჰუმანიტარულ საჭიროებებს და არ ახორციელებს საკმარის საზოგადოებრივ ზეწოლას ალიევზე, რათა შეაჩეროს ეთნიკური წმენდის კამპანია“, – თქვა მენენდესმა და მოუწოდა აშშ-ის პრეზიდენტის ჯო ბაიდენის ადმინისტრაციას შეწყვიტოს ნებისმიერი დახმარება აზერბაიჯანისთვის.
მენენდესმა მოუწოდა შეცვალოს მიდგომა და არა მხოლოდ მხარი დაუჭიროს სომხეთსა და აზერბაიჯანს შორის მოლაპარაკებებს, არამედ შუამავლის როლი შეასრულოს მხარეებს შორის შეთანხმების დადებაში.
“დარწმუნებული ვარ, რომ შეერთებულ შტატებს შეუძლია და უნდა ითამაშოს აქტიური როლი ამ კონფლიქტის მოგვარებაში”, – განაცხადა მან.
სენატორი ასევე დარწმუნებულია, რომ ეთნიკური წმენდის ამ კამპანიის ორგანიზატორებმა, მათ შორის ილჰამ ალიევმა, პასუხი უნდა აგონ თავიანთ დანაშაულებზე.
ბობ მენენდესი თვლის, რომ ევროკავშირმაც უნდა გადადგას ნაბიჯები ამ სიტუაციის მოსაგვარებლად. მან გაიხსენა ევროკავშირის დიპლომატიის ხელმძღვანელისჟოზეპ ბორელის სიტყვები მთიან ყარაბაღში არსებული ვითარების შესახებ.
„იმედი მაქვს, რომ ამ სიტყვებს მოქმედებაც მოჰყვება. იმის ნაცვლად, რომ აზერბაიჯანის გაზი აიღონ და ეს ქვეყანა წარმოადგინონ, როგორც, მე ციტირებ, “მნიშვნელოვან პარტნიორად ენერგეტიკულ სექტორში”, მათ ასევე უნდა მოახდინონ ზეწოლა ბლოკადის დასასრულებლად”, – თქვა მენენდესმა.
სენატორმა ხაზგასმით აღნიშნა, რომ ახლა მსოფლიომ იცის ალიევის გენოციდური ზრახვები და არ უნდა დაუშვას ამ სომხური თემის განადგურება. მან დასძინა, რომ აღდამის გზის გახსნა არ არის ლაჩინის დერეფნის გახსნის ალტერნატივა. ბობ მენენდესმა პირობა დადო, რომ ყველაფერს გააკეთებს იმისათვის, რომ სომხების წინააღმდეგ ამ სასტიკი კამპანიის დამნაშავეებმა პასუხი აგონ და დაისაჯონ.
