ეროვნული ასამბლეის მმართველი ფრაქციის „სამოქალაქო შეთანხმების“ დეპუტატმა გევორგ პაპოიანმა აზერბაიჯანის პრეზიდენტის ილჰამ ალიევის განცხადებაზე ისაუბრა, რომ აზერბაიჯანი უარყოფს სომხური მხარის მიერ საზღვრის დემარკაციისთვის შემოთავაზებულ რუკებს. Armenpress-ის ცნობით, პაპოიანმა ხაზგასმით აღნიშნა, რომ სომხეთისთვის ეს განცხადება მიუღებელია და ამავდროულად დასძინა, რომ უარის შემთხვევაში აზერბაიჯანმა უნდა წარმოადგინოს ისეთი რუკები, რომლებსაც აქვთ სამართლებრივი საფუძველი.
დეპუტატმა აღნიშნა, რომ სომხურ მხარეს სურს მოლაპარაკების მაგიდაზე დაიდოს ნებისმიერი რუკა, რომელსაც აქვს სამართლებრივი საფუძველი.
„თქვენ ამბობთ, რომ აზერბაიჯანი უარს ამბობს სომხური მხარის მიერ შემოთავაზებულ რუკებზე. ამ შემთხვევაში აზერბაიჯანმა შემოგვთავაზოს ისეთი რუკა, რომელსაც ექნება სამართლებრივი საფუძველი. შეგიძლიათ მოიტანოთ ძვ.წ მე-2 საუკუნის რუკა, შეგიძლიათ მოიტანოთ თურქმენჩაის ხელშეკრულების შედეგად ჩამოყალიბებული რუკა. არასერიოზულია. რუკას უნდა ჰქონდეს სამართლებრივი საფუძველი და იყოს ოფიციალური დოკუმენტი და არა ისტორიკოსების მიერ შედგენილი რუკა, როგორც მათ სურთ. ასე არ შეიძლება. ასეთი რუკის წარდგენა ომს გამოიწვევს. ეს არის ჩვენი მკაფიო პოზიცია“, – განაცხადა პაპოიანმა.
პაპოიანის თქმით, მიუხედავად იმისა, რომ ალიევის განცხადებები მშვიდობას არ უწყობს ხელს, სომხური მხარე აზერბაიჯანთან მოლაპარაკებებს გააგრძელებს, რადგან წინააღმდეგ შემთხვევაში ორივე მხარე ომზე წავა.
