ირანელი ექსპერტი ყვება, თუ როგორ უპასუხა თეირანმა ბაქოს გეგმებს სომხეთის გავლით დერეფნის გახსნის შესახებ
ბოლო თვეების განმავლობაში ირანმა ორჯერ მოახდინა ჯარის მობილიზება აზერბაიჯანის საზღვრებთან. ამის შესახებ NEWS.am-ის ჟურნალისტთან საუბარში განაცხადა ირანისა და ევრაზიის კვლევების ინსტიტუტის ექსპერტმა გოდრათოლა შაფიემ.
მან დასძინა, რომ ირანში არსებობს მოსაზრება, რომ თეირანის ამ ზომების შედეგად აზერბაიჯანს ჯერ არ გაუხსნია ახალი ფრონტი სომხეთის წინააღმდეგ სიუნიქის ასაღებად და ე.წ. ზანგეზურის დერეფნის პროექტის განსახორციელებლად.
მისი თქმით, ე.წ. ზანგეზურის დერეფნის პროექტი ჯერ კიდევ არ არის დავიწყებული და ბაქო არ იწყებს ახალ აქციას, რადგან იცის, რომ საერთაშორისო თანამეგობრობა ამჟამად არ იწონებს მსგავს ზომებს.
„ზუსტად ეს არის მიზეზი იმისა, რომ აზერბაიჯანი არ მიმართავს აქტიურ ქმედებებს. თუმცა, როგორც კი ახალი მიზეზი ექნებათ, იქნება ახალი კონფლიქტები სომხეთთან, ახალი ქმედებები სომხეთის წინააღმდეგ.
ამჯერად საუბარი არ არის ყარაბაღზე, ძალისხმევა მიმართულია სომხეთის სუვერენიტეტის წინააღმდეგ, რადგან მათ (თურქეთს და აზერბაიჯანს – რედ.) სურთ იგივე დერეფნის გახსნა სომხეთის სიუნიქის რეგიონის გავლით“, – აღნიშნა შაფიემ.
მან აღნიშნა, რომ ირანი ცდილობს ხელი შეუშალოს მათ ამ მიზნების მიღწევაში.
„ვერავინ იტყვის, რომ აზერბაიჯანის მხრიდან ახალი პროვოკაციების შემთხვევაში, ირანი ჩაერთვება ამ კონფლიქტში, მაგრამ აშკარაა, რომ არსებობს მკაფიო სიგნალები იმისა, რომ თეირანი არ აპირებს აზერბაიჯანს სომხეთის ტერიტორიაზე დერეფნის გახსნის უფლებას მისცეს“, – განაცხადა ექსპერტმა.
არამ დანიელიანი
