ჩინეთს რუსული ნავთობის შესყიდვაზე 100%-იანი ტარიფი ემუქრება: ბესანტი
აშშ-მ გააფრთხილა ჩინეთი, რომ ვაშინგტონი ჩინურ საქონელზე 100%-იან საიმპორტო ტარიფებს დააწესებს, თუ ის სანქციების ქვეშ მყოფი რუსული ნავთობის შეძენას გააგრძელებს, განაცხადა აშშ-ის ფინანსთა მინისტრმა სკოტ ბესანტმა.
როგორც იტყობინება „როიტერი“, აშშ-სა და ჩინეთს შორის სტოკჰოლმში ორდღიანი სავაჭრო მოლაპარაკებების შედეგების შეჯამებისას, ბესანტმა ასევე გამოთქვა უკმაყოფილება ჩინეთის მიერ ირანული ნავთობის შესყიდვის გაგრძელების გამო, რომელიც ასევე სანქციების ქვეშაა, და ორმაგი დანიშნულების საქონლის რუსეთისთვის მიყიდვის გამო, რაც პირდაპირ გავლენას ახდენს უკრაინაში ომის გახანგრძლივებაზე.
აშშ-ის ფინანსთა მინისტრის თქმით, ჩინეთის წარმომადგენლებმა, ამ გაფრთხილებების საპასუხოდ, გამოაცხადეს თავიანთი „ენერგეტიკული სუვერენიტეტის“ შემდგომი დაცვის განზრახვა. „ჩინელები ძალიან სერიოზულად ეკიდებიან თავიანთ სუვერენიტეტს და ჩვენ მას არ დავარღვევთ, თუ ისინი გადაწყვეტენ 100%-იანი ტარიფის გადახდას“, – ხაზგასმით აღნიშნა ბესანტმა.
მინისტრმა განსაკუთრებით გამოყო კონგრესში განხილული კანონპროექტი, რომელიც ითვალისწინებს 500%-იანი ტარიფის დაწესებას იმ ქვეყნებიდან იმპორტზე, რომლებიც რუსულ ენერგორესურსებს ყიდულობენ. „ვფიქრობ, ყველა, ვინც რუსულ ნავთობს ყიდულობს, ამისთვის მზად უნდა იყოს“, – განაცხადა სკოტ ბესანტმა პრესკონფერენციაზე.
