ნიკოლ ფაშინიანმა მონაწილეობა მიიღო შანხაის თანამშრომლობის ორგანიზაციის სამიტის SCO+ ფორმატის შეხვედრაში ჩინეთში, ტიანძინში და სიტყვით გამოვიდა, სადაც განაცხადა, რომ აზერბაიჯანის პრეზიდენტის ილჰამ ალიევის ლექსიკა არ ასახავს ვაშინგტონის შეთანხმებებს.
ალიევმა ჩინეთში SCO+ ფორმატის შეხვედრაზე განაცხადა, რომ „ზანგეზურის დერეფანი“ უახლოეს მომავალში შუა დერეფნის, ასევე ჩრდილოეთ-სამხრეთის დერეფნის კიდევ ერთი მნიშვნელოვანი მონაკვეთი გახდება, რაც მშვიდობას გააძლიერებს.
ფაშინიანმა აღნიშნა, რომ სომხეთისა და აზერბაიჯანის ლიდერების მიერ მიღებულ დეკლარაციაში გარკვეული ტერმინოლოგია შეთანხმდა, რომლის გამოყენებაც ხელს შეუწყობს კონსტრუქციული ატმოსფეროს შექმნას და შემდგომი სამუშაოების განხორციელებას.
„მინდა ვაცნობო ჩვენს პარტნიორებს, რომ აზერბაიჯანის პრეზიდენტის მიერ გამოყენებული ენა ჩვენ მიერ არ აღიქმება იმ ლოგიკით, რაზეც ვაშინგტონში შევთანხმდით, მით უმეტეს, რომ ამ შეთანხმებების ფარგლებში, სომხეთის რესპუბლიკა და შეერთებული შტატები განახორციელებენ კომუნიკაციების საინვესტიციო პროგრამას სახელწოდებით „ტრამპის გზა საერთაშორისო მშვიდობისა და კეთილდღეობისთვის“. ეს პროგრამა სომხეთის რესპუბლიკის „მშვიდობის გზაჯვარედინის“ პროექტიდან მომდინარეობს, რომლის შესახებაც სომხეთის რესპუბლიკამ და ამერიკის შეერთებულმა შტატებმა ამ პროექტის შემუშავებისა და ინვესტირების შესახებ ორმხრივი მემორანდუმი გააფორმეს. კიდევ ერთხელ ვადასტურებ, რომ სომხეთის რესპუბლიკა ერთგულია მიღწეული შეთანხმებების და ჩვენ მტკიცედ ვართ გადაწყვეტილი, რაც შეიძლება მალე განვახორციელოთ ეს შეთანხმებები“, – განაცხადა ფაშინიანმა.
მან ხაზგასმით აღნიშნა, რომ ამ ყველაფრის შედეგად, სომხეთსა და აზერბაიჯანს შორის არა მხოლოდ გაიხსნება კომუნიკაცია შიდა, ორმხრივი და საერთაშორისო კომუნიკაციისთვის, არამედ შეიქმნება ახალი ლოგისტიკური შესაძლებლობები შანხაის თანამშრომლობის ორგანიზაციის ყველა წევრი სახელმწიფოსთვის, მათ შორის სომხეთისა და აზერბაიჯანის უშუალო მეზობლებისთვის.
