რუსეთი „ტრამპის გზა საერთაშორისო მშვიდობისა და კეთილდღეობისთვის“ საკომუნიკაციო პროგრამასთან დაკავშირებით თავის პოზიციას მაშინ ჩამოაყალიბებს, როდესაც მოსკოვს ამ სატრანსპორტო პროექტის განხორციელების დეტალური გაგება ექნება.
Armenpress-ის ცნობით, ამის შესახებ სომხეთის რესპუბლიკაში რუსეთის ელჩმა სერგეი კოპირკინმა გაზეთ „სუნიაც ერკირთან“ ინტერვიუში განაცხადა.
ელჩის თქმით, რუსეთის საგარეო პოლიტიკის ერთ-ერთი ურყევი პრიორიტეტია სამხრეთ კავკასიაში მშვიდობისა და სტაბილურობის განმტკიცება და ამ მიდგომის შესაბამისად, მოსკოვი, ბუნებრივია, მხარს უჭერს სომხეთსა და აზერბაიჯანს შორის ურთიერთობების ნორმალიზებისკენ მიმართულ ნებისმიერ ძალისხმევას.
„რაც შეეხება ე.წ. „ტრამპის მარშრუტს“ (რედ.: „ტრამპის მარშრუტი საერთაშორისო მშვიდობისა და კეთილდღეობისთვის“), რუსეთის პოზიცია ჩამოყალიბდება მას შემდეგ, რაც გვექნება დეტალური წარმოდგენა იმის შესახებ, თუ როგორ განხორციელდება ეს სატრანსპორტო პროექტი. ჩვენი ინფორმაციით, ეს სამუშაო ახლა იწყება. ტვირთებისა და მგზავრების გადაყვანის რეჟიმები, ასევე საგზაო მოძრაობის უსაფრთხოებასთან დაკავშირებული დეტალები ჯერ არ არის შეთანხმებული. რეგიონში სატრანსპორტო კავშირების განბლოკვის მცდელობები მოითხოვს სომხეთის ევრაზიულ ეკონომიკურ კავშირში გაწევრიანების გარემოებების, ასევე სომხეთ-ირანის საზღვარზე რუსი მესაზღვრეების ყოფნის გათვალისწინებას ორმხრივი დოკუმენტების საფუძველზე. ამავდროულად, მინდა დავამატო, რომ რუსული მხარე ღიაა ამ საკითხებზე კონსულტაციებისთვის როგორც სომეხ პარტნიორებთან, ასევე სხვა დაინტერესებულ მხარეებთან, მათ შორის თეირანთან“, – ხაზგასმით აღნიშნა რუსეთის ელჩმა.
მან ასევე დასძინა, რომ რუსეთის ფედერაციამ და პრეზიდენტმა ვლადიმერ პუტინმა პირადად ჩაუყარეს საფუძველი სომხეთ-აზერბაიჯანის შერიგების პროცესს.
„2020-2022 წლებში რუსეთის, სომხეთისა და აზერბაიჯანის ლიდერებს შორის ხელმოწერილმა სამმხრივმა შეთანხმებებმა არა მხოლოდ შეაჩერა სისხლისღვრა ადგილზე, არამედ განსაზღვრა ერევანსა და ბაქოს შორის ურთიერთობების ნორმალიზების ძირითადი მიმართულებები, მათ შორის სამშვიდობო ხელშეკრულების შემუშავება, ეკონომიკური და სატრანსპორტო კავშირების ბლოკადის მოხსნა, საზღვრების დემარკაცია და დელიმიტაცია, ასევე სამოქალაქო საზოგადოებასთან კავშირების განვითარება“, – განაცხადა ელჩმა.
