თურქეთის შინაგან საქმეთა სამინისტროს წარმომადგენელი „ზანგეზურის დერეფნის“ მნიშვნელობას სუეცის არხის გახსნას ადარებს
თურქული სახელმწიფოების ორგანიზაციის (OTS) წარმომადგენლები ბაქოში „ზანგეზურის დერეფნის“ გახსნის მნიშვნელობაზე მსჯელობენ. დისკუსია ორგანიზაციის ქვეყნების არასამთავრობო ორგანიზაციების „სოლიდარობის ფორუმის“ ფარგლებში მიმდინარეობს, იუწყება APA.
„ზანგეზურის დერეფანი თურქული სამყაროს ერთიანობის სიმბოლოა“, – განაცხადა CAREC-ის პროექტების ოფისის დირექტორმა მერგენ კეპბანოვმა. მისი თქმით, „ზანგეზურის დერეფანი ქმნის პირობებს თურქულ სამყაროში თანამშრომლობის განვითარებისთვის ეკონომიკურ, კულტურულ, სახალხო დიპლომატიურ და სხვა სფეროებში. თურქმენეთი მზადაა გააძლიეროს თანამშრომლობა თურქული სამყაროს ყველა ქვეყანასთან ყველა მიმართულებით“.
უზბეკეთის ოლი მეჯლისის საკანონმდებლო პალატის კომიტეტის თავმჯდომარემ, იუკსალიშის მოძრაობის ხელმძღვანელმა, ბაბურ ბეკმურადოვმა აღნიშნა: „ზანგეზურის დერეფანს სტრატეგიული მნიშვნელობა აქვს თურქული სამყაროსა და ფართო ევრაზიული სივრცისთვის. ის შუა დერეფნის ნაწილია, რომელიც აერთიანებს აღმოსავლეთსა და დასავლეთს. ზანგეზურის დერეფანი ჩვენთვის უმოკლესი და ყველაზე მოსახერხებელი სატრანზიტო გზა გახდება. ის სარგებელს მოიტანს ლოჯისტიკისა და ხარჯების შემცირების თვალსაზრისით. მეორეს მხრივ, ეს დერეფანი ხელს შეუწყობს საგარეო ვაჭრობის დივერსიფიკაციასა და განვითარებას. ზოგადად, შეგვიძლია ვთქვათ, რომ ცენტრალური აზიისა და სამხრეთ კავკასიის ურთიერთდაკავშირება ზანგეზურის დერეფნის წყალობით ახალ ეტაპზე გადადის. ჩვენ გვესმის, რომ ასეთი პროექტების განსახორციელებლად აუცილებელია მშვიდობა და სტაბილურობა. ამ კონტექსტში, უზბეკეთი მხარს უჭერს აზერბაიჯანსა და სომხეთს შორის სამშვიდობო პროცესს“.
თავის მხრივ, თურქეთის შინაგან საქმეთა სამინისტროს სამოქალაქო საზოგადოებასთან ურთიერთობის დეპარტამენტის გენერალური დირექტორის მოადგილემ, ოზჯან აიგუნმა აღნიშნა: „ზანგეზურის დერეფნის სრული ამოქმედება ისტორიული მოვლენა იქნება და მნიშვნელოვან წვლილს შეიტანს რეგიონისა და მსოფლიოს ეკონომიკაში“. მისი თქმით, დერეფანი, პირველ რიგში, მნიშვნელოვან სარგებელს მოუტანს რეგიონისა და ცალკეული ქვეყნების ეკონომიკას, ასევე მსოფლიო ეკონომიკას. „თუ სუეცის არხის გახსნამ დიდი უპირატესობა მოუტანა რეგიონის ქვეყნებსა და გლობალურ ეკონომიკას, მაშინ ზანგეზურის დერეფანი რეგიონის ეკონომიკაში სერიოზული ცვლილებების დასაწყისი გახდება“, – ხაზგასმით აღნიშნა მან.
