ევროკავშირი გეგმავს სომხეთიდან ექსპორტირებული რიგი პროდუქტების საბაჟო გადასახადების გარეშე მიღებას – ფაშინიანი
ევროკომისიამ გადაწყვიტა, სომხეთიდან ექსპორტირებული რიგი პროდუქტებისთვის ავტონომიური სავაჭრო ზომები გამოიყენოს, რაც საშუალებას მისცემს ამ პროდუქტების ნაწილს ევროკავშირში საბაჟო გადასახადების გარეშე ექსპორტირება მოახდინოს.
ამის შესახებ სომხეთის პრემიერ-მინისტრმა ნიკოლ ფაშინიანმა მთავრობის სხდომაზე განაცხადა. მისი თქმით, ინიციატივა სომხეთიდან პოტენციური ექსპორტის დაახლოებით 80 პროცენტს შეეხება.
„უბაჟო ექსპორტის რეჟიმი გავრცელდება სოფლის მეურნეობის პროდუქტების დაახლოებით 99 პროცენტზე, ასევე ალკოჰოლური და უალკოჰოლო სასმელების დაახლოებით 90 პროცენტზე. პროდუქტების საბოლოო სიები ჯერ კიდევ დაზუსტდება“, – თქვა მან.
პრემიერ-მინისტრმა აღნიშნა, რომ ევროკავშირის წევრმა სახელმწიფოებმა უნდა დაამტკიცონ გადაწყვეტილება, ხოლო ევროპარლამენტმა უნდა მიიღოს შესაბამისი რეზოლუცია და ამას დრო დასჭირდება. „პოლიტიკურ დონეზე საკითხი არსებითად გადაწყვეტილია. ახლა აუცილებელია კერძო სექტორთან მუშაობა, რათა სრულად გამოვიყენოთ პრაქტიკულ დონეზე შექმნილი შესაძლებლობები“, – დასძინა ფაშინიანმა.
გავიხსენოთ, რომ 2 ივლისს ევროკომისიის პრეზიდენტი, ურსულა ფონ დერ ლაიენი, სამუშაო ვიზიტით სომხეთში ჩავიდა. ვიზიტის ფარგლებში, ევროკომისიის პრეზიდენტი სომხეთის რესპუბლიკის პრემიერ-მინისტრს, ნიკოლ ფაშინიანს შეხვდა.
