სრ განათლების, მეცნიერების, კულტურისა და სპორტის მინისტრმა ჟანა ანდრეასიანმა მიიღო საქართველოს პარლამენტის დელეგაცია განათლების, მეცნიერებისა და ახალგაზრდობის საქმეთა კომიტეტის თავმჯდომარის გივი მიქანაძის ხელმძღვანელობით.
შეხვედრას ესწრებოდნენ განათლების, მეცნიერების, კულტურისა და სპორტის მინისტრის მოადგილეები არტურ მარტიროსიანი და არაქსია სვაჯიანი, ეროვნული ასამბლეის დეპუტატი ნარეკ ბაბაიანი, საქართველოს საგანგებო და სრულუფლებიანი ელჩი სომხეთში გიორგი შარვაშიძე და საქართველოს პარლამენტის განათლების, მეცნიერებისა და ახალგაზრდობის საქმეთა კომიტეტის რამდენიმე წევრი.
მიესალმა რა სტუმრებს, სრ განათლების, მეცნიერების, კულტურისა და სპორტის მინისტრმა ჯერ მიულოცა საქართველოს საფეხბურთო გუნდის წინა დღის წარმატება, საბერძნეთთან გამარჯვება. ორ ქვეყანას შორის მჭიდრო მეგობრული ურთიერთობების განვითარების უზრუნველსაყოფად, ჟანა ანდრეასიანმა ხაზი გაუსვა განათლების, მეცნიერებისა და ახალგაზრდობის სფეროებში ერთობლივი პროგრამების განხორციელების შესაძლებლობების განვითარებას და გაფართოებას.
„საქართველოს აღმასრულებელი ორგანოს კოლეგებთან ორმხრივი თანამშრომლობის დღის წესრიგის განხილვის შესაძლებლობის შემდეგ, მოხარული ვართ, რომ გავაგრძელოთ ეს დიალოგი საკანონმდებლო ორგანოს ფარგლებშიც. ვფიქრობ, ორმხრივი ვიზიტები და დისკუსიები აჩვენებს ორ ქვეყანას შორის ურთიერთობების მაღალ დონეს“, – აღნიშნა ჟანა ანდრეასიანმა და ხაზი გაუსვა თანამშრომლობის პოტენციალის სრულ რეალიზებას.
შეხვედრაზე საუბარი შეეხო საქართველოს განათლების, მეცნიერებისა და ახალგაზრდობის მინისტრის გიორგი ამილახვარის ხელმძღვანელობით დელეგაციის ვიზიტს სომხეთში, რომლის ფარგლებშიც, 27 მარტს, საზეიმოდ გაიხსნა ქართველოლოგიის ცენტრი ქ. ერევნის სახელმწიფო უნივერსიტეტში.
მინისტრმა ჟანა ანდრეასიანმა გამოთქვა რწმენა, რომ ეს ხელს შეუწყობს პარტნიორობის გაღრმავებას. „ჩვენ მზად ვართ განვიხილოთ ჩვენი სამომავლო გეგმები და აქტივობები ქართველოლოგიის ცენტრზე დაყრდნობით. ეს არის შესანიშნავი საწყისი წერტილი, საიდანაც ჩვენ შეგვიძლია გავაფართოვოთ ჩვენი ერთობლივი მუშაობა ამ მიმართულებით. თბილისის სახელმწიფო უნივერსიტეტში ფუნქციონირებს არმენოლოგიის ცენტრი, რომელსაც აქვს ძალიან კარგი ტრადიციები. ვფიქრობთ, რომ ჩვენი მუშაობა ამ მიმართულებით შეიძლება იყოს ძალიან პერსპექტიული“, – განაცხადა მინისტრმა.
საქართველოს პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარემ გივი მიქანაძემ მადლობა გადაუხადა მიღებისთვის და ხაზი გაუსვა ორ მეგობარ ხალხს შორის პირდაპირი კონტაქტების მნიშვნელობას. ამ კონტექსტში გივი მიქანაძემ ხაზი გაუსვა როგორც აღმასრულებელ, ისე საკანონმდებლო ორგანოებს შორის მჭიდრო თანამშრომლობის გაღრმავებას.
შეხვედრაზე მხარეებმა ასევე განიხილეს საქართველოს სომხურენოვანი სკოლების სომხური ენისა და ლიტერატურის მასწავლებელთა პროფესიული მომზადების, ატესტაციისა და სერტიფიცირების ფარგლებში ერთობლივად განხორციელებული სამუშაოები, სომხეთის საჯარო სკოლებში ქართულის სწავლების გამოცდილება და მისი შესაძლებლობების გაფართოება, ასევე სახელმწიფოთაშორისი პროგრამის ფარგლებში განხორციელებული სასტიპენდიო პროგრამა.
ქართულმა მხარემ ხაზგასმით აღნიშნა, რომ დაინტერესებულია სომხეთის რესპუბლიკის საჯარო საგანმანათლებლო დაწესებულებებში „სასკოლო კვება“ პროგრამის განხორციელების წარმატებული გამოცდილებით. მეზობელ ქვეყანას სურს პროგრამის უფრო დეტალური შესწავლის შემდეგ ქართულ სკოლებში ლოკალიზება.
საქართველოს პარლამენტის წარმომადგენლებთან შეხვედრაზე ასევე განიხილეს ორმხრივი თანამშრომლობის პროგრამები მეცნიერების, უმაღლესი განათლებისა და ახალგაზრდობის სფეროებში, სადაც კიდევ ერთხელ დადასტურდა მზადყოფნა გადაიდგას ნაბიჯები ურთიერთობების გასაძლიერებლად. კერძოდ, ხაზი გაესვა Erasmus+-ისა და Horizon Europe-ის პროგრამების ფარგლებში ერთობლივი პროგრამების განხორციელების შესაძლებლობას, რაც ხელს შეუწყობს ორი ქვეყნის უნივერსიტეტებისა და სამეცნიერო ორგანიზაციების ინტერნაციონალიზაციის პროცესის განვითარებას.
სრ განათლების, მეცნიერების, კულტურისა და სპორტის მინისტრმა ასევე ხაზი გაუსვა სომხეთსა და საქართველოს შორის ახალგაზრდული ფორუმის ორგანიზების მნიშვნელობას, რაც უდავოდ ხელს შეუწყობს ორი ქვეყნის ახალგაზრდებს შორის კომუნიკაციისა და დიალოგის განვითარებას, მეგობრული კავშირების განმტკიცებას და ახალი ერთობლივი ინიციატივების განხორციელებას.
შეხვედრაზე ასევე განიხილეს ორმხრივი ინტერესის მქონე სხვა საკითხებიც.
